Mi a yega di bisa esaki prome y mi tabay bisa esaki atrobe: Bida no ta un solo storia uniforma, e ta diferente pa cada persona y djies pasobra ami a conta cu e privilegio di imigra, bin Aruba y haci algo cu mi bida no kiermen tur hende por. Si mi ta honesto, tin un trend den nos sociedad cu mino ta gusta mucho y esey ta e echo cu hende kier pretende di ta revolucionario sin sa con pa ta inclusivo. Esey ta cu hende kier mobiliza nos sociedad, pa medio di posiciona nan mes den un lugar  caminda nan ta kere nan ta miho cu un otro. Esaki ta pa e hendenan cu ta bou comentarionan di noticianan husgando bida di otro, esaki ta pa esunnan cu tur dia ta riba Facebook criticando e “mentalidad di isla” sin tene na cuenta e situacion cu ta pone hende pensa den un cierto manera.

Bida no ta un solo storia uniforma,”

 

Esunnan cu sa di comunicacion, sa masha bon cu prome cu kier manda un mensahe
Bo tin cu comprende bo audiencia. Si bo a bay Hulanda, bo a bay Merca wherever bo a bay studia y bo ta bin bek cu diploma pensando cu bo ta bal mas cu e mesun sociedad cu a financia bo e placa ey, pa bo bay. Kico bo a studia di berdad? E ta facil pa aspira na cosnan cu ta pafo di e isla, ora bo mente ta wordo colonisa pa tanto influencia di identidadnan cu no tin nada di haber cu esun dibo, e ta facil pa pensa cu ken bo ta y di unda bo ta bin no tin mucho pa ofrece mundo. Ora cu den cada huki tin un mc donalds y un burger king, pero bono por menciona un restaurant crioyo foy bo cabes… Ora cu tur hende kier pone bo isla riba suela pa x of otro motibo. Ora cu locual bo isla tin pa ofrece ta wordo perdi den discusiionnan politico…

Corda, politiconan ta traha pa nos, no ta nos ta traha pa nan. Nan salario ta wordo paga cu impuesto cu ciudadanonan ta paga.  Ora bo bay Hulanda pa studia y un Hulandes puntrabo
Si boso tin wasmachine riba e isla, bira puntre si e sa cu ken su oro e gouden koets a wordo traha. Corda cu bo ta bin di hende di lama, hende cu a cria generacionnan completo cu nan dos mannan.

Podise bo ta puntra bo mes, kico un cos tin di haber cu otro, of pakico mi ta pensa cu e cosnan aki ta relevante. Wel, nan ta relevante pasobra den un futuro ta nos lo ta esunnan encarga cu mobilisa sociedad. A nos ta e futuro ministernan, e futuro artistanan, abogadonan, scientificonan you name it. Pronto, bo lo stop di ta hoben y conta cu algo cu yama “privilegio di adulto”. Y bo lo ta poni den un posicion cu talvez ta haci cu bo por habri porta pa otronan.

Ora cu bo ta scondi tras di un ipad, un Iphone, un Ibook, corda cu tur ta cuminsa cu “I”
Cu Facebook, Twitter, Instagram, corda bo I voice, y corda cu bo por expresa bo mes.
Cu locual abo tin di bisa ta bal mesun hopi cu cualkier otro hende den comunidad.
Pasobra na ken bo ta kere Mike Eman ta referi ora e bisa “Nos?”

 

Bo por sconde tras di un otro idioma, bo por sconde tras di pretexto, tras di marca, tras di logronan pero ken bo ta lo keda cubo pa resto di bo bida. Bo curason semper lo reconoce cas.
No compromete bo identidad pa ningun hende.

 

Leave a Reply

Your email address will not be published.