ORANJESTAD – Mi hendenan!  Augustus a yega riba nos manera sin nada. Election ta bati na porta, emocionnan ta halto. Un aire di insiguridad ta reina tur caminda y mientras cu partidonan ta mustra sigur di nan victoria, hopi ta esunnan cu no tin ni minimo idea di kico ta bay pasa riba september 22.

 

Prome cu tur cos, studiantenan y tur otro Arubiano cu ta pafo di e isla mester tin derecho di vota. Pakico despues di un aña na Hulanda mi por a vota caba, pero mino mag di yuda di dicidi futuro di un isla unda mi tabata henter mi bida. Ami ta haya e cos ey scandaloso mirando cu hopi di nos tin planes di bin bek y aporta na nos sociedad. Pero bon, it is what it is. Podise e echo cu mino por vota ta te hasta dunami mas credibilidad pa comenta riba politica pasobra mino tin nada di gana. Niun hende por bisa cu mi ta skirbi riba un agenda politico manera algunnan cu nos conoce.

 

Mino kier ta un mas cu ta keda riba e tema laaf di politica pero manera mi a bisa prome, e ta algo cu ta concerni nos tur. Mi titulo e siman aki tabata referi na e echo cu tin ora hende ta invitabo bin sinta come cu nan, no pasobra nan kier ofrecebo cuminda sino mas bien pasobra abo tin algo cu nan kier. Dia aden y dia afo mi ta mira hopi hoben cu ta talentoso y tin bon plataformanan social wordo manipula pa no solamente politiconan sino tambe hende cu kier uzanan como brugnan pa yega unda nan tin mester.  Tur hende sa cu tur hende cu poderoso ta busca un “protege”. Esaki tin ora ta nan yiu, nan sobrino, sobrina of gewoon un hende hoben cu nan a haya pa pronkia cune. Tur hende cu tin hopi di sconde semper ta busca un cu ta mustra mas lief y genuino pa ta su cara y su “right hand” mientras e ta do the dirty work. E ta un strategia comun.

Hubentud, ora e ta combina cu “looks” y talento cu den algun manera ta commercial ta un receta basta peligroso si e cay den mal man. Mino ta ni dje bunita ey y mino ta considera mi mes algo commercial tampoco,  pero mi a deal cu bon pida di hende cu semper tabata keda buscami. Pasobra riba Facebook semper mi a expresa mi mes y mi ta comparti mi poesia online, hopi ta tume como invitacion pa ofrecemi poco deal masha sketchy. Nan ta cuminsa “Bin papia aki, bin haci esaki, laga nos entrevistabo, mi kier a puntrabo pa bo haci tal y tal cos, skirbi esaki, skirbi esaya”.  Semper e mesun “Djies kier pick bo brain un rato” y despues sin cu bosa bo ta hinca den un mess.

Den mi circulo mes, mi ta rond di yen hoben cu ta den un manera “doing good for themselves”. Mi ta papia hopi cu nan tocante esaki. Tocante ta cauteloso cu tur locual bo energia ta atrae. Paso luz ta atrae luz, pero e atrae fruminga di hala tambe. Mi hendenan, specialmente esunnan cu tin poco mini artista den famia, tene cuidao cu kico hende ta ofrece nan. Bo tin un yiu, sobrina of sobrina cu un bon celebro riba schouder dune poco conseho.
No ta pasobra un hende gusta bo talento of kico bo tin di bisa, kiermen nan gusta abo of kier wak bo bon. Personalmente, mi fout di mas grandi semper tabata pa keda rond di hende cu tabata stima mi talento pero odia cu e tabata bin dimi.