ORANJESTAD Mi hendenan! Un luna a pasa manera si nada y awo ta un luna so mas falta mi bay bek tera frieu. Masha vreselijk con lihe tempo ta pasa. Un dia manera awe, dos aña pasa mi tabata preparando tur cos mi bay Hulanda sin sa kico tabata sperami, pero bon ban papia.

 

Tur ora cu mi ta core rond riba e isla y algo cu ta sorprendemi hopi ta e abundancia di iglesianan cu magicamente ta aparece tur caminda. Mi ta kere cu entre e caminda di Maria College Mavo pa Van Dorp na Dakota, mi a conta manera cinco. Den e dianan aki, mi ta pensa hopi riba e topico di salud mental. Mi ta lesa delaster un cos cu mi por haya, no tin duda cu te hasta riba e isla tin un conversacion tumando luga. Mi a bay un encuentro secreto cu un politico, un asina yama “secret focus group” nos tabata como 20 hende den un sala y esey tabata un topico cu hopi hende kier a debati riba dje. Tin un preocupacion grandi pa cu e topico aki, no solamente pasobra hopi hende mester ayudo psychologico na Aruba sino tambe pasobra ainda e topico ta taboo y hopi hende ta asocia problemanan mental cu locura.

E motibo cu mi ta link e conversacion di tanto iglesia cu e conversacion di salud mental ta pasobra nos ta bin di un cultura creyente. Aunke personalmente mi no tin nada contra fe y cristianidad. Aunke mi ta sigur cu ta hopi hende a wordo salba pa medio di e Dios cu nan ta scoge pa kere aden. E ta hacimi dolor pa pensa cuanto hende dia aden y dia afo ta sufri y nan mester tende cosnan manera “Busca Dios”, “Bo ta asina pasobra bono tin cristo den bo curason” etc, etc. Nos ta hende cu kier laga tur cos “den man di Dios” sin ripara cu tin problemanan cu fe no por soluciona sino mas bien guia profesional y aun asina, tin circumstancianan unda nada ta yuda.

Papiando di experencia propio, mi por bisa cu poco luna pasa, mino tabata den e miho estado mental. Wel, henter mi bida mi ta pensa cu mi cabes no ta mucho bon, pero e biaha aki mi tabata miso, na Hulanda y di un dia pa otro bida cotidiano tabata sinti manera un bloki na mi pia. Mi tabata cancela tur afspraak, mi a stop di bay haci mi presentacionan poetico, come malo, drumi hopi, etc. Mi amigonan tabata rabia cumi, bisami stop di haci coy kens.

Esaki hopi biaha ta un di e motibonan pakico hende ta sinti berguensa di papia di nan estado emocional. Pasobra na luga di topa cu comprension nan ta topa cu yen hende cu ta bisanan ta coy kens nan ta haci. Mi ta supone hopi hende no ta comprende con problemanan cu ta den un mente ta funciona pero djies pasobra cu bono por wak algo no necesariamente kiermen cu e no te’y. Pakico e ta facil pa kere den un Dios cu bono por wak, pero duro pa kere cu un hende cu ta mustra bon di pafo ta bringando un bataya paden?

Hende no por imagina con hopi energia e ta tuma pa mantene un estado mental positivo. Specialmente ora bo ta pasando den circumstancianan duro. Ora bo ta struggle emocionalmente, te hasta haci cosnan minimo manera bay bebe un coffee cu bo amiga ta mustra manera algo di otro mundo.

Sea comprensivo cu e amiga of amigo ey cu semper ta cancela plan, check riba bo amigo of amiga cu semper ta alegre den e grupo, check riba esun cu tabay di e fiesta trempan pasobra grupo grandi di hende ta haci e nervio. Y su un hende tin e curashi suficiente pa ta vulnerabel cubo, si e tin e curashi di admiti cu e ta struggle cu su salud mental y pa e motibo ey e no kier wak niun hende porfabor comprende. Hopi hende cu ta sufri ta isolanan mes, no pasobra nan no stimabo sino mas bien pasobra nan stimabo asina tanto nan no kier pegabo cu nan pena.