No ta cos cu mi ta un experto den politica, pasobra mi no ta. Simplemente un hoben cu ta purba di conclui su propio opinionnan. Pero mas mi ta wak reunionnan den parlamento, mas mi ta sigui Facebook, mas mi ta sigui kico pueblo tin di bisa. Mas mi ta pensa cu ora e ta yega na politica, Aruba merece un comienso nobo.

Un comienso nobo, cu strategianan limpi, sin promesanan falso. MEP a bin MEP a bay, AVP a bin AVP a bay, AVP a bolbe bin, pero pa añanan largo e rivalidad entre e dos partidonan aki a parti sociedad den dos. Pasobra e ta parce cu hende semper tin cu ta of MEP of AVP, pasobra “Aruba” no ta un partido politico. Y  bo no por ta pro un decision cu AVP a tuma, sin cu bo ta contra MEP completo.

Pero  kisas esey mes nos mester, partido Aruba. Un cu ta dedica na bienestar di pueblo sin tin necesidad di desvia di nan trabou politico pa constantemente trata cu e constante atake  di familiarnan di otro. Tur dia un ta mete cu un otro su mama, cu un otro su tata, parlamentarionan segun redo social no ta haci nada pa e pais, pero tin tempo pa skirbi mil y un relato tur siman purbando di limpia nan nomber.  Anto e ora den ken pueblo tin cu confia? Unda e credibilidad ta keda si nos propio politiconan cu tin e “miho interes” di tur pueblo na curason no por ni mira otro cu humanidad? Pasobra niun no por ta “politicamente corecto” pero ta hura di ta politico si.

Politica tin un reputacion sushi, un reputacion di ta un carera corupto, pa hende golos y sin berguensa. Y kisas esaki tambe ta algo cu mester cambia, e mentalidad cu cual nos ta wak politica riba su mes. Politica ta un parti hopi esencial den un comunidad, paso sin politica e ora ta ken ta goberna e pais? pa e motibo ey ta importante pa sikiera cuminsa kere cu politiconan bon ta existi. Pasobra kere ta e prome paso pa algo bira un realidad. Si no tin ningun persona riba ningun lista di ningun partido cu bo ta considera algo mas cu un politico, algo manera un…uhm un bon ser humano. Pa ken bo ta bay vota?

Tin hende cu no ta envolve mucho cu politica, cu kier keda leu di e drama. Pero bo sa kico? Si bo no mete den politica, no ta nada paso politica si ta mete cu bo. Y abo como ciudadano ta esun cu ta biba cu tur e consecuencianan di e decisionnan cu politiconan ta tuma. Pues como ciudadano, uza bo privilegio y no pensa riba bo so ora bo vota, pensa riba un sociedad completo. Tin hende na mundo cu ta cana 5 ora na pia, desde nan bario chikito simplemente pa nan por vota. Pues

stop di bisa cu bo no ta worry.

Cuminsa na vota Aruba, paso e berdad ta cu MEP y AVP a haci, tur dos mientras cu nan tabata of ta den poder a haci. Nos no por bisa cu no, tur dos tin bon y tur dos tin malo. Pero ki dia e ta bay stop? Ki dia Aruba lo haya e privilegio di tin politiconan cu no ta grita otro manera ta bestia nan ta den parlamento? Ki dia nos lo conoce un politica cu no ta mara na privilegio di ningun fam of un historia largo di corupcion su tras? A bira tempo pa un comienso nobo. Pero esey ta algo cu e pueblo so por scoge.

 

Publica den Bon Dia Aruba 10/7/2015