UTRECHT – Manera e rapper Drake lo bisa “What a time to be alive”…esta un tempo pa ta na bida mi hendenan. Cuanto badabada den noticia y entre muhenan bunita competiendo pa un corona y hendenan pafo di un areopuerto ta protesta, mi ta pensa
esta un desaster.

 

Prome cu mi cuminsa papia di locual di berdad mi kier papia, mi kier bisa algo.
Y no ta cu mi ta zona manera un hater of cu mi ta jaloers pasobra “mino ta bunita of flaco suficiente” pa participa, beyesa ta bin den tur size y ma dicidi cu mi size ta cute okay. Pero, bueno sinceramente hende no ta cansa di e mundo di beyesa? E no a bira laaf y outdated caba? I mean te kidia nos mester wak e creme de la creme di beyesa rond di mundo ta desfila den bikini pa “prove a point” esta cu bo tin cu ta mas cu bunita? Sabiendo, cu pa nan beyesa so e muhenan ki podise ta wordo trata miho cu e muhe comun y coriente cu ta cana rond. Di berdad nos mester certamennan di beyesa ainda? Y si e mundo di beyesa ta malo, mas pio ainda ta e obsesion sadistico cu nos isla tin cune. En todo caso, spera mi por wak tur hende ta elogia y apoya masalmente otro cosnan local cu tin un poco mas peso social y un impacto mas leu cu caricia nos egonan. Pasobra ta aparenta, cu si no ta riba un plataforma internacional hende no ta worry.  Ta hopi den sociedad ta keda sufri di  “low self-esteem issues” y ta keda warda te ora media internacional duna nos validez pa grita cu nan ta orguyoso.

 

Anyways, bek na papia di cosnan mas importante manera humanidad. Recientemente mi a reach out na mi amigo cu ta di e religion muslim pa puntr’e con bay y con e ta sinti. Mirando tur e odio cu ta wordo benta constantemente riba su religion y su hendenan mi tabata tine basta presente den mi pensamentonan. E ta bisami cu e no ta comprende e odio, cu e ta lesa e comentarionan bou di e noticieronan Hulandes y e ta considera sali di e pais. E problema ta cu e, mescos cu un otro amiga dimi e ta un refugiado. Pues e no tin papel y eno ta wordo defendi ni pa su pais di origen ni pa Hulanda, e ta biba letterlijk den aire. Fuera di e echo cu mi ta considera e un di e personanan mas bunita cu mi a yega di conoce den mi bida y cu porta mi ta te hasta un poco biased pasobra mi ta pensa mi ta un poco namora di e prince aki di Afghanistan. E berdad ta cu ami tampoco ta comprende e odio contra hendenan cu ta asina bunita. Di berdad, na Hulanda e prome hendenan cu a tratami cu decencia tabata e muslimnan. Mi a drenta un tienda di Turco y nan tabata comiendo y sin pensa dos biaha nan a ofrecemi un tayo. E unico muhenan cu ta hari cubo den centraal station of den bus ta of Caribense of nan tin hijab bisti.

 

Ta rond di muslims ta manera ta rond di hende Caribense simplemente cu un diferente contexto cultural. Mi ta corda e dia cu nos tabata sinta na mesa na universidad. E prince di Afghanistan, su ruman muhe, un Hulandes y ami. E prince tabata conta di con media ta manipula islam. E ta conta cu den islam muhenan tin un posicion mas halto cu homber y cu ta berdad cu nan ta permiti di tin mas cu un casa pero esaki ta solamente si nan por stima y cuida nan tur mesun cos. E ta contami cu su mama ta un muslim moderno y cu e no ta ni bisti un hijab y cu su tata ta permiti esey. Un sin fin di storia el a comparti cumi. Pero manera tur otro hende cu a bay laga nan pais bou di circumstancianan peligroso e tambe kier bay cas. E ta yora pa su Afghanistan pasobra el a bay Hulanda cu 4 aña y e nunca a conoce su patria. Den un poema yama “home” skirbi pa Warsan Shire, cu a bira e himno di refugiadonan rond di mundo e poeta di Somalia, cu tambe a scapa guerra ta bisa:  “Niun hende ta scoge camponan di refugiado, of prison pasobra e ta mas sigur cu un ciudad na candela, niun hende kier wordo humilla, bati, discrimina. Niun hende ta laga nan cas al menos cu cas ta den boca di un tribon. Bo solamente ta core bay na e frontera ora bo ta wak full bo ciudad coriendo tambe”  Y esaki ta locual mi kier hende corda, cu den e temponan aki unda odio y xenophobia ta mustra di ta at an all time high, ora e presidente mas poderoso di mundo no ta haci mas cu pusha palo bou candela y stigmatisa miniorianan y un religion.  Corda, cu media ta traha cu agenda, cu nan no tabay bisabo kico pa pensa pero nan lo bisabo riba kico pa pensa si. Cu si algo wordo ripiti hopi biaha bo tabay cuminsa kere cu e ta un berdad. Tempo mi tabata na Aruba juni,mi a mustra e mi amiganan un potret di e prince di Aghanistan cu tur su amigonan ta gosa na Croatia, nan prome reaccion tambe tabata “Yakari,  nan tur ta bon dushi pero hala leu di terrorista” . Pa bo por drenta un otro hende su pais tin reglanan berdad, pero reglanan no por bin prome cu un hende su humanidad. Media hopi facil por pone hende comun y coriente mustra manera nos enemigonan ora nos ni conocenan. Den e temponan aki, nos mester tene oreanan y wowonan habri, pero nos curason tambe.

 

Leave a Reply