UTRECHT – Mi hendenan, con bay! Mi ta spera despues di tur e drama cu a pasa siman pasa nos tur tin un siman placentero y trankil. Pasobra, ban ta serio sociedad merece un descanso di tanto fechoria cu ta pasa eyfo constantemente.

Tanto nos ta alaba Americano y nos a bira mescos cu nan, cuanto basketball players y cantante no ta bati nan muhenan sin cu esaki den algun manera ta afecta nan carera? Chris Brown a hera mata Rihanna pero asina e saca un otro hit nos tur ta gosa. Mi a wak hopi bon articulonan rond, skirbi pa ciudadanonan tocante e caso di violencia domestico cu a tuma luga. Den mayoria caso, e argumento tabata lo siguiente. Como sociedad nos ta keda duna “free pass” na hombernan abusivo. Nan ta haci y deshaci sin enfrenta ningun tipo di consecuencia pa nan actonan. Pero esaki no ta nada nobo, violencia domestico a bira un cd rasca cu nos tur ta cansa di scucha y esey ta precisamente pakico e ta mas importante cu nunca pa enfatisa riba e echo cu abuso y violencia no ta algo normal. E ta importante pa keda rabia cu mesun forsa cada biaha un caso di abuso bin dilanti, e ta importante pa lanta para y bisa cu e no ta corecto.

Claro cu tabata tin esunnan cu a tuma parti pa e abusador, tur hende ta den bida di tur hende pero ora ta yega pa mete di berdad e ora “wel ja, ta su bida priva”. E caso a bira bieu y podise e no tin ni sentido mas pa skirbi tocante di dje pero ta remarcabel pa menciona cu tabata tin hopi resistencia di parti di ciudadano si. Cu hopi tabata pro y a go with the flow, pero hopi a mustra con desapunta nan ta cu e manera cu cosnan ta tuma luga. Mi amiga mes tabata di participa pa e concurso di soca y caiso pero el a bisa bon cla cu e no ta sostene violencia domestico. El a dicidi di para tras di su virtud y despues di a hinca placa y tempo den su participacion el a dicidi di no hacie. Esaki ta locual nos mester mas di dje, no solamente hende cu ta contra algo sino cu nan ta actua desde nan virtudnan tambe.  
Tsunami a pull out NFL publicity stunt y subraya cu nan ta un famia y cu nan no ta sostene violencia domestico pero nan lo sostene nan integrante si. Dios mester hinca man cu e cosnan aki, hesuse.

Pa añanan largo mi a contribui cu mi “talento” di skirbi unda cu mi tabata por, cual fundacion cu ta, pa hende, pa negoshinan, pa reinana cu a bay participa den concursonan di carnaval y tabata tin mester di un speech. Nunca ma bisa cu no y mi ta cuestiona, si den un futuro ami mester faya, ami mester haci algo cu niun hende nunca a spera dimi. Pueblo tambe lo tumami man habri bek? Mi tambe lo wordo pordona? Of esaki ta conta pa hende masculino so? Mi lo por keda cu mi trabou? Mi lo por keda representa nomber di un compania aunke mi a haci cosnan moralmente incorecto? Pense un rato.
Pa caba e articulo mesun positivo cu mi a cuminsa, mi tin cu menciona cu mi a bay London haci un soño bira realidad. Mi a bay conoce mi poeta favorito y e motibo pa cual ami ta skirbi esta Alysia Harris. Mi hendenan, ma hera muri! Mino por a kere cu e tabata di carni y weso y mi a brase y papia cune y te hasta bay have dinner cune despues di su tayer. Si un hende lo a bisami cu e cos aki lo a pasa un 6 aña pasa mi lo a bisanan stop di ta iluso. Pero mane nan ta bisa, some dreams do come true. Pa comparti locual mi a siña di Alysia, mi kier subraya algo cu e la remaraca den e tayer di skirbimento cu a egt keda cumi. E ta bisa, tende escritornan,  cu hopi biaha ora nos ta skirbi nos ta gusta keda riba e superficie. E ta bisa “Okay, you can say someone ripped your heart out but that is lazy”. Esey lo ta manera leun riba un dicho cu ta wordo uza hopi na luga di purba na duna bo sentimentonan un imagen real. Pasobra, pa prome niun hende nunca a yega di “have their heart ripped out” literalmente pues kico e kiermen na final di dia? E ta bisa, puntra bo mes kico den berdad bo ta sinti, bo ta tristo? Okay. Con bo ta kere bo tristesa ta smaak? Con bo ta kere e ta mustra? Cual color bo lo dune?
Bo lo imagina cu un curason kibra lo por ta color neon? Si ta asina cual tipo di neon? Y di eynan cuminsa construi bo poema. E poema of e articulo nunca ta e meta final, e meta final ta pa disfruta e proceso cu ta hibabo na crea e poema of e articulo. Siña stima e proceso mas hopi cu e producto final pasobra ta e proceso ta locual ta hacibo un bon escritor.

Leave a Reply