ORANJESTAD –  Oh dande 2017 a bin pa saludabo, ay nobe. Oh dande, mi 2017 a cuminsa brabo ay nobe! Wel, mi hendenan new year,
new me esey nos tur di.
Te ora cu mi a yega un supermercado pa cumpra un basora y mi a ripara cu mi ta e mesun feminista di semper.

Wak, no ta cu mi kier cuminsa aña ta keha y duna sermon tocante pakico e ta importante pa cambia e manera cu nos ta percibi muhenan den nos sociedad. Pero, mundo simplente ta provocami. Mi a hera haci escandalo na un supermarket pero mi a corda mi mes cu mi tin cu skirbi “Den mi Cabes” y podise conta bosa e storia ta mas leuk cu cansa mi mes emocionalmente ta bringa cu hende. Aña a habri y mi mama cu ken hopi conoce como “Duska” a haya e fantastico idea di tira yen lentejas den cas cu su creencianan raro di prosperidad. El a tira e bonchi chikito ney tur caminda pero puntra ken mester a bari?! You guess it, esta que esta aki. Leuk, fantastico, love it. Wel, bariendo mi a kibra e basora. No puntrami con, pero e basora a kibra den dos den mi man.

Yegando e cashier den supermarket ta paga pa mi basora nobo mi ta scucha e cashier di nacionalidad Chines tabay halto cu un meneer. Orea a para manera satelite y mi ta scucha e homber bisa “Ami? Ami no ta ni wak un stove mes. Pakico bo ta kere mi a casa? Esey ta mi muhe su trabou”. Pa prome, mi tabata hopi intriga pa e manera cu e muher Chines tabata defende su punto di bista ya e tabata argumenta cu e homber cu si señora ta traha tambe pakico e no por colabora den cushina. Mi tabata intriga no solamente pa e muher aki su persistencia, si no mas bien pasobra na diferencia di muhenan, ban bisa Latino por ehempel cu ta conoci pa ta “spicy y peleon” muhenan Asiatico en general tin fama di ta hopi sumiso. E homber ta sigui argumenta cu e ta traha mas duro cu su muher y ta pa e motibo ey e muhe tin cu cushina. Mi ta scuche bisa “E ta para so henter dia, ami? Tin dia cu minosa mes si mi ta yega cas”. E cashier ta sigui argumenta cu sigur su señora tambe ta cansa y e homber ta insisti cu no. Den mi mes mi ta manera “YES. SISTER. YOU TELL HIM!”

Mi ta corda 2016 en especialmente tabata un yena cu violencia contra hende muhe.
Cada siman practicamente tabata tin casonan di violencia domestico den noticia.
E cos pio ta cu hopi hende muhe no ta ni consciente cu nan ta wordo abusa of cu nan ta cu hombernan abusivo. Pasobra realmente, un hende cu ta pensa cu bo cansancio no ta conta pasobra segun e, e ta traha mas cubo ta un abusador.
Laat den 2016, un amiga dimi y mi feminista preferi esta Zahira Kelly a lansa un hashtag online cu a go viral yama #maybehedoesnthityou y dilanti a bin hopi muhenan cu nan propio experencianan cu abuso emocional. Pasobra ta berdad, podise e no ta dal bo pero e ta pensa cu bo lugar y deber como muher ta den cushina. Podise e no ta dal bo, pero e ta yega cas cansa di trabou y actua manera cu ta bo culpa su bida no tabay manera cu e kier. Podise, e no ta dal bo pero e keda sin papia cubo dos dia pasobra bo a corta bo cabey sin pidie permiso.

Porfabor, ta 2017 y nos mester feminismo mas cu nunca. E pensamento aki cu muhenan den un manera ta menos cu homber ta haci daño na nos tur. Nos mester cambia e manera cu nos ta lanta nos yiu hombernan, e ta algo cu tin cu pasa colectivamente.

Aña a habri y mi ta cla pa sigui cu mi mesun gana di skirbi pa un causa, cu mi mesun gana di sirbi pueblo, cu mi mesun gana di lucha. Si bo kier mobiliza sociedad, bo mester educa hende muhe. Ladies, haci esaki e aña cu bo ta cuminsa uza bo stem. E aña cu bo ta laga atras tur hende cu ta uzabo manera un recurso solamente pasobra bo ta di sexo femenino. Si e no ta tratabo manera un reina #Dumphim2017.

 

Leave a Reply