UTRECHT – Yep, e ta presidente. Barack Obama a bay y tur hende mester cuminsa mara faha pasobra locual ta bin no ta bunita. Donald su presidencia tabay tin un ripple effect full rond di mundo y nos no por actua manera cu no ta asina.
Pakico tabata tin marcha di hende muhe full rond di mundo ayera? Te hasta na Aruba! Pasobra nan tabata para den solidaridad cu Merca, pasobra Merca ta e pais mas poderoso di mundo, pasobra si Merca no ta bon nos niun no ta bon. All hail the Yankee Dollar.  “Island girl, Donald Trump wants me go home, still pull up with my wrist looking like a snow cone” e rapper Nicki Minaj, kende ta originalmente di Trinidad ta canta den “Black Barbies”. Cu “snow cone” e kiermen tur e diamantenan cu e ta bisti na su man. Claro, Nicki no ta e unico cu ta preocupa cu Donald Trump, nos tur ta. E diferencia ta cu e, manera hopi otro tin un snowcone berdad, nan tin miyones na un banco. Y tur hende sa cu esunnan cu mas tabay sufri bou di Trump su presidencia ta esunnan menos afortuna, specialmente Latinonan y Muslims kende Trump a insulta mas cu un biaha durante su speechnan.

Mino por gaña si, mi a gosa hopi riba internet e dia di inauguracion presidencial. E meme’s nan tabata fo’i control, e edit di e videonan y creatividad di hende simplemente no tin ningun limite. The internet is undefeated manera Mayweather. Mi a hari te haya dolor di bariga, mino por a keep up cu Twitter y Instagram y cada vez cu mi tabata kere cu mi a haya e meme di mas pret un otro tabata aparece. Ta parse cu mundo collectivamente a siña uza humor pa anda cu desgracia. Hari pa nos no yora, pasobra kico mas tin pa haci? Kibanda nos tin Geert Wilders uzando tur Trump su tacticanan pa convence Hulandes cu nan ta kitando Hulanda di nan. Su ultimo joke durante un di su speechnan tabata  “Muhenan Hulandes tin miedo di sali riba caya cu nan cabey blond pasobra nan ta wordo ataka”. Wel, tur e blondies ta cana rond den mi caucasian university masha unbothered. Nan no ta mustra niun tiki preocupa, pero segun Geert cu porcierto no ta ni Hulandes y ta tiña su cabey blond manera impostor cu e ta esaki ta locual ta pasando.

“Not my circus, not my monkeys” Mi kier bisa mi mes tin ora, pero boso mes sa. E activista den mi ta yena cu adrenalina. Boso ta kere cu e cosnan aki no tabay afecta nos? Diosa cuanto di e Trump supporters nan ey cu ta pensa cu nos tur ta menos cu nan ta bin bishita nos isla.
Tur e hendenan ey cu a grita y festeha ora Donald Trump a grita cu tur Mexicano ta violado, ta bin cana rond den nos cayanan, cana mey mey di nos hendenan, humilla e Latinonan cu ta traha den hotel. Esey no ta spantabo? Ni un tiki? Cu e pais mas poderoso di mundo awo tin un presidente cu ta target esunnan di mas vulnerabel y no ta ni kere cu global warming ta algo real? Di berdad nos a lucha asina hopi pa harmonia entre nacionnan pa conta cu un lider kende ta kere solamente un grupo di hende merece privilegio? Den bon Dominicano “Papa Dios, mete mano!”

Leave a Reply