ORANJESTAD – Ban laga e recap di 2016 y speransa pa 2017 pa otro siman.
Miso coriendo rond di e isla manera turista,  mi ta pensa, na final di dia, ken su isla e ta? Pa prome mino por bisa cu e ta dimi, mi stima e isla manera cu e lo ta si.

Asina tanto, cu mi a bisa mi meneer di research concepts cu mi thesis ora mi caba di studia lo mester ta tocante algo cual resultado den un manera lo beneficia Aruba. Podise mi por haci un encuesta riba con localnan di berdad ta sinti tocante turismo, con poco poco nos a wak tur cos cu ta crioyo y autentico perde na man di “Americanismo”. Con, ta te awo un revolucion cultural ta tumando luga of  podise con trempan muchanan Latino ta cuminsa experencia micro-aggression pa motibo di nan nacionalidad na scol. Porta mi por investiga unda e segundo generacion di imigrante ta end up riba e isla. Esunnan cu ta biba cu e peso riba nan lomba di “live the better life”, pasobra nan mayor a imigra pa nan por tin esaki. Ami mes, por conta e storia, cu mi mama na algun momento tabata tin te hasta tres trabou pa cubri gasto y tabata lanta tur mainta hibami scol tog.


Aruba ta pa Arubiano y ta di Arubiano, esey nos ta bisa. Esey semper nan a bisa ami creciendo, pero si nos ta honesto e dinastia di e dos of ta tres famianan cu ta run the show
riba Aruba no ta ni Arubiano at all. Desde tempo cu mi a cuminsa haya interes den activismo social mi ta cuestiona, na ken politiconan di berdad ta referi ora nan ta bisa “nos”?

Sinta cu un amiga dimi ariba na un bar den Renaissance el e a remarca riba con bunita e isla a bira, con e practicamente parse un luga di luho awo. E isla ta mustra manera cu nos tur kinan ta biba un high lifestyle y aunke nos calidad di bida riba e pida baranca aki ta hopi mas miho cu algun paisnan grandi, e division entre clase social na Aruba ta hopi obvio y e diferencia con nos ta tratanan ta obvio tambe. Ta berdad, mainstreet y e area ey parse un soño di cual bono kier lanta, pero kico den berdad e ta bal si e poder di compra a baha, cuanto aña lo tin cu pasa y cuanto negoshi mas lo bay bancarota prome cu nos cuminsa cosecha locual gobierno a planta?

 

Porta pasobra final di aña a yega, esaki ta e nostalgia ta opina y no ami. Pero mi a bin Aruba tempo mi tabata tin cuatro aña. E Aruba cu ami a crece aden, no ta existi mas y e no lo existi nunca mas tampoco. Caya grandi ta bunita, Palm beach area ta mas bunita ainda, pero e cayanan patras di aereopuerto ta demasiado scur anochi, pa añanan largo e ta scur, e decoracionnan di e rotondenan ta bira mas simpel cada aña, e casnan di e ciudanonan regular dibaina tin luz. Cada biaha bo core rond, tin mas tereno roza, mas condominium na caminda, mas shopping mall, mas bar y sin laga afo e cantidad di supermarket cada pasa tres cas. Cuanto di nan ta di Arubiano? E mas tristo ta cu e no ta cu nos no kier, si no mas bien cu nos no por. E prijsnan di belasting te hasta pa bo cuminsa un “small business” ta ridiculo.

Mi ta biba practicamente den un mondi y ainda un 5 aña pasa mi por a bisa cu mi tabata wak tur sorto di parha mainta, yuwana tabata drumi den rei bou di otro riba cadushi. Awo nada, no puntrami con un trupiaal ta mustra of un prikichi pasobra mi tin tanto tempo sin wak un cu mi a lubida. Awo kier prohibi saco di plastic y foam box, leuk. Awo cu ya no ni tin mondi pa nan bula bay aden mas. Si Aruba ta un producto manera nan sa yame, ta ora pa nos haya sa di berdad ken ta endorse e,  ken ta su target market, na ken e ta bendiendo su mes, ki balor e ta creando den mercado y con esaki ta crea shared value pa su habitantenan. Bo no ta haya?

 

 

Leave a Reply