UTRECHT – Un paar di dia mas y mi ta riba luga. Na ultimo momento mi a pensa cu mi curason no por tuma no ta na Aruba december dus ja. Pero bueno, let’s get to business. E titulo di mi articulo ta referi na Izaline Calister su cantica yama “porfin”.

 

Aunke e cantica riba su mes ta uno tocante un amor cu a bay, entre e liñanan tin
Un mensahe hopi cla. E cantante ta wardando pa e dia cu e lubida tur cos, yega porfin.
Mi ta sintimi identifica cu e cancion aki, pasobra ami tambe ta sinti cu mi tin añanan largo wardando algo porfin yega na su fin. Mi kier mira un fin na ignorancia, na racismo, na discriminacion, na nos manera di husga otro, nos manera di punta dede sin cuestiona, sin busca den nos mes prome. Pero anywho, mi tampoco ta perfecto y el a tumami hopi trabou pa ta ken mi ta awo. Algo si, e ta djies dushi pa pensa cu kisas un dia lo bin  unda cu nos pensamento cambia y na luga di wordo siña kico pa pensa, nos wordo siña con pa pensa.

Mi ta pensa tur hende ta spera cu mi tabay duna un comentario of skirbi mi alma afo tocante e caso di e mucha di 14 aña y bisa algo coherente of inteligente. Di berdad, mino tin nada pa bisa cu mino a bisa prome. Unda mayoria di hende ta para ora e ta yega na trata cu asuntonan delicado, sexual, cu ta inclui menornan di edad? Nan ta para na e mesun banda cu nan ta para tur ora. Si e victima no ta un santo, no tin pakico defende y punto. Hashtag #FreeOz, pero niun hende kier papia di un manera pa conscientisa hobencitanan y hobencitonan di e peliger di anda y basila cu hende cu ta hopi mas grandi cu nan. Mi ta ripiti, ora hende grandi ta prooi riba mucha. semper e tin di haber cu poder, pasobra nan por haya un di nan mesun edad pero nan lo sinti mesun poderoso. Algo si mi tabay bisa, si bo coy pinda y hince den un boter di biña esaki no kiermen cu e ta stop di ta pinda. Simultaneamente, bo por tuma un mucha di 14 aña y hinca esaki den un sapato di muhe grandi. E no kiermen cu e ta stop di tin 14 aña.

Ken pa culpa y unda pa cuminsa, si desde chikito muchanan ta wordo exponi na tur sorti cos.
Si nos ta biba den un era di hyper-sexualisation. Hopi ta haci manera cu nunca nan tabata tin 14 aña y a haci cosnan foy sla. Lubidando, cu un mucha di 14 aña ta actua desde impulso y no desde rason. Den mayoria di caso, muchanan no ta nada mas cu producto di e ambiente cu nan a crece aden, nan ta wordo influencia pa cosnan cu nan ta mira y cosnan cu nan ta scucha.
Henter dia riba Instagram, Twitter, Facebook ta glorifica hende cu ta “sexy”, ta comparti
videonan di hende ta baila provocativamente, muhenan cu ta subi trapinan di fama y exito basa riba nada mas cu con nan ta mustra. Uuhhh, Kardashians, uuuh. Ora tur kier ta Kylie Jenner y Kylie Jenner tabata tin 17 aña ora cu den luz di dia el a cuminsa sali cu un homber di 25 y a bira un e “it girl”. Ora mucha muhenan ta siña cu nan por uza nan curpa manera un pasashi pa cierto eventonan, pa cierto estilo di bida. Kico di berdad nos ta spera? Mino ta culpando ningun hende, mi ta simplemente ilustrando algun ehempel di cosnan cu di un manera directo of indirecto ta influencia e manera cu nos ta pensa. Nos kier mucha keda mucha, pero nos ta laganan ta mucha berdad? Nos tabay haci manera cu nan no ta e target di comerciantenan?
Cu pone hobencitanan mita sunu riba un billboard no ta nan manera principal di bende?
Cu te hasta pa haci obra di caridad nan tin cu desfila den bikini?  Ken nos kier gaña?

.

 

Leave a Reply