ORANJESTAD – Recientemente yen caso turbulento ta reina den comunidad.
Pakico e ta asina dificil pa nos como comunidad para pa husticia? Mescos cu no tin

ser humano perfecto, no tin victima perfecto tampoco.l

Prome tabata e caso di e agente femenino cu a wordo viola y mayoria hende kier a punta dede bisando cu, si cu e no mester a fiesta. Cu kico e tabata tin bisti, cu wak su bida, cu su mes a busca cu etc. Pues pa hopi hende el a pone su mes den un posicion, caminda el a “busca” pa un acto cu ta inhusto, prohibi y condena pa ley wordo haci cu ne. Kico hende kiermen cu esaki e ora? Cu un muhe cu ta na su cas, curpa completamente tapa, si merece tur hende nan misericordia y comprension, pero un otro muhe cu ta biba un bida mas liber no? Esaki pa comunidad kiermen cu un ta e victima perfecto y e otro ta djis un victima? Pakico e ta asina duro pa pidi pa esunnan culpabel para responsabel pa abusa di un otro hende, pero facil pa wak bou di cual situacionnan actonan ta wordo cometi?

Simpatia

Pakico como hende na motibo cu algo inhusto wordo cometi, ta mas facil pa sigui opinionnan popular, na luga di purba di mira cosnan den un manera mas neutral. Sin husga, sin tin cu punta dede? Ora e polis burachi a dal e hoben cu a fayece recientemente. Otro drama mas, pakico e mucha tabata riba caya? Ki mishi e mucha ta cana? Unda su mayornan tabata ta? E no ta suficiente cu un mayor ta pasa den e dolor di perde su yiu, pero tambe tin cu lesa e acusacionnan tur caminda. Na luga di hende move desde un luga di humanidad y empatia pa un hende cu ya caba ta experenciando algo traumatico. E ta mas facil pa husga, punta dede y imagina cu si un hende lo a comporta nan mes miho, talbes cosnan no a pasa. Na luga di acepta cu e daño ta haci caba y lo unico cu por wordo haci awo, ta busca un manera sano di lidia cu e dolor.

Unda humanidad ta keda? Ayera, medionan social a explota ora e caso di e docente cu a “bully” un mucha a bin dilanti. Kitando e echo cu canal 22 a graba un video poniendo muchanan papia frasenan cu hopi obviamente un hende a bisa nan pa bisa.(Pues uza mucha pa manipula emocionnan di hende). Na luga di pone atencion na e acto baho aki. Miles di hende contra un mayor, miles di hende contra un mucha. Educadornan ta bin dilanti cu nan comentarionan, sociedad ta bin dilanti cu nan comentarionan. Pasobra segun e palabra di caya, e mucha tabata uno “problematico”. E mucha ta conoci pa no comporta su mes bon. Esaki kiermen atrobe, cu e mucha ta un victima perfecto? Cu pasobra e ta causa problema e merece wordo maltrata pa un docente? E echo cu e comunidad di Aruba ta asina lihe pa husga un hende cu ta sufriendo, na luga di demanda husticia, ta papia hopi di kico nos ta como hende. Ki dia nos como comunidad ta bay stop di pone hende cu ta pasa den algo traumatico sinti berguensa y na su luga sinti nos sosten? Tragedia, dolor, malesa, bullying, abuso, maltrato etc. Ta cosnan cu no ta discrimina, nan por pasa cu ken cu ta, den cualkier posicion social, den cualkier luga na cualkier ora.

Sigui discrimina victimanan basa riba nan pasado of di unda nan ta bin of kico nan a haci

y sigui hustifica hendenan cu ta haci malo. Masha leu nos t’ey yega, bisti bril pasobra futuro ta briya masha .

Leave a Reply