ORANJESTAD – Danki Dios mi a bin Aruba december, oh mi dios, bo por imagina un pasco sin ham, den frieu, miso? Ey no hopi trauma mes mi lo a keda. Agradecido mi ta, pa tur cos, te hasta e cosnan malo. Di e banda aki, ta gratitud so mi ta sinti. Wel, gratitud y dolor di stoma pasobra e comento a bay foy man.

 

Boso sa cu Jeon tin un cantica cu yama “agradecido”? E no a pega mes duro cu “dushi bida’
Sinembargo mi ta haya agradecido mas bunita si. E cantica ta bisa “ No sea mal agradecido, bo ta atrobe ariba pia, bo a pasa un dia mas, bo a logra un dia mas, danki Dios bo tin famia danki Dios bo tin cas. Agradecido mi ta, locual mi tin ta suficiente, hisa bo cara y wak..bida ta awe den presente’. Hopi bunita letra, hopi al caso tambe.

 

Mi a pasa dia 23 di december ta lora regalo pa un grupo di mucha menos afortuna cu un amiga dimi. Miso tabata pensa, riba e simplesa di nan “verlanglijst” pa Pasco. Cu mientras otro ta spera Iphone’s y cosnan di marca, e muchanan aki tabata tin como deseo coy cabey di color, renchi di orea, shower gel, face scrubs entre otro. Mi a bay drumi anochi ta pensa riba e muchanan aki. Ki tur nan lo a biba caba den nan bida cortico, cuanto cos nan lo a wak, cuanto di nan soñonan nan circumstancianan lo a mata caba. E activista den mi tabata rabia, e humano den mi decepciona y e futuro mama den mi tabata curason kibra.
Semper mi a pensa, cu hende mester ta liber pa haci locual nan ta haya nan gana cu nan bida.
Pero cosnan ta diferente ora tin mucha envolvi, pasobra nan ta steun riba esunnan mas grandi pa haci e cosnan corecto. Ora bo decisionnan ta pone e muchanan sufri e ora nos tin cu papia di berdad. Den un manera, haya yiu ora bo ta den un mal situacion ta wordo considera irresponsabel, den un otro manera esaki ta resistencia tambe. Pasobra, hopi ta kere cu haya yiu ta un privilegio pa hende cu placa so y hende cu tin menos no mester reproduci.
Ta hopi mucha cu a nace den situacionnan menos faborabel, cu ta uza esaki como motivacion pa triunfa den bida. Pero okay, ban debati riba esaki un otro dia.

Personalmente, mi ta hopi encontra di midi circumstancianan di otro hende pa mehora e perspectiva cu mi tin di mi propio bida, mi a bisa esaki caba. Mi ta pensa cu si mi ta di ta agradecido ta pasobra gratitud ta algo bunita y no pasobra otro hende tin un bida “pio” of ta pasando den circumstancianan mas duro cumi. Mi no ta haya husto pa ‘guilt trip” otro hende pasobra nan ta privilegia mesun hopi cu mino ta haya husto pa uza hende menos afortuna como ehempel. Locual si nos por admiti, aunke cu nos no kier ta cu tin circumstancianan dificil cu ta pone otro circumstancianan dificil mustra manera basicamente nada. Prome cu aña sera, mi kier djies encurasha bo pa bo puntra bo mes si di berdad bo ta pasando malo of bo ta hogando bo mes den un glas di awa. Wak bo problemanan desde ariba, obhetivamente
y puntra bo mes si nan ta problemanan di berdad of algo cu lo pasa despues di un tiki tempo.

Si di berdad bo tin tanto mala suerte of ta djies un nubia yobiendo riba bo.
Si bo ta haciendo un fruminga di un baca, si bo ta birando loco pa cosnan cu tin solucion.
Mino kier zona manera un pastor, djies relfexiona un poco. Aña ta den bira ruman, ta ora pa laga algun cos atras. Semper, semper tin un motibo pa ta agradecido, den absolubtamente tur situacion, busca esaki.

Leave a Reply