yakari

 

UTRECHT- Mi ta sigur boso a wak e palabra “Milennial” ta circula. Kico ta un “Milennial” precies? Tin diferente manera pa wak e, pero esaki ta referi na e generacion di hende naci entre e añanan 1980 pa mas o menos 2000.

Conoci tambe como generacion “Y”, “generacion me”, “The Peter Pan generation”.
E referencia na Peter Pan, ta pa indica cu hopi di nos, segun nan,  no kier crece y ainda ta biba cu nos mayornan te na edadnan mas laat cu generacionnan prome cu nos. Uhm hallo, un hende a wak e economia? Anyways, e referencia na “me”,  ta na e echo cu nos ta wordo considera un generacion egoista. Nos Millenials ta esunnan cu ta sigui despues di “Generation X”. Manera mi juffrouw di marketing a bisa den klas, Milennials actualmente ta e “talk of the moment”, pasobra nos ta na e edad cu nos ta tin potencial pa ta cliente y hopi compania ta inverti miyones anualmente pa investiga nos. Nan kier sa unda nos placa tabay, kico ta nos principionan, den kico nos ta kere, etc.

Hopi di nos ta wordo considera malcria y masha poco e termino Milennials ta wordo tira den un luz positivo.Te hasta Milennials nan mes ta encontra di nan propio generacion.
Y mi ta puntra mi mes si berdad nos ta asina malo of nos djies a internalisa tur e odio cu nan ta tira riba nos constantemente. Riba Instagram kidia, mi a clash cu un otro poeta ora el a post cu nos ta djies un generacion di “hook up” y cu nos no sa nada di romance. Mi a bisa e
“Misa bo ta djies skirbi poesia cu tur hende tabay gusta y bo kier apela na un publico, pero tin te hasta estudionan cu a comproba cu Milennials ta teniendo menos relacion sexual compara cu tur e generacionnan cu a bin prome cu nan”. Kiermen, ni “hook up” nos kier “hook up” mas. E ta facil tira culpa riba Milennials pa tur locual ta fout cu mundo actualmente. Pero boso a wak e commentarionan riba Facebook? Ken ta esunnan cu ta parando firmemente contra injusticia? Milennials. Ken ta esunnan cu ta rogando Mike ppa tene encuenta medio ambiente, pa no bora den nos awanan teritorial? Milennials. Ken ta esunnan cu sin miedo algun a marcha pa derechonan di homosexualnan na Aruba? Milennials. Nos artistanan local di mas briyante na e momentonan aki, esunnan cu ta pushando barera cu musica positivo? Millenials. Nos ta e generacion di mas open minded cu a existi y e generacionnan prome cu nos ta intimida cu esaki. Nos ta e ultimo generacion cu a disfruta di un niñes sin technologia. Nos ta e uniconan cu por argumenta e pro y e contra di technologia simplemente pasobra nos ta e unico generacion cu a crece cu y sin dje. Nos ta yena cu idea y ambicion pero lamentablemente nan ta keda pusha nos atras. Bosa con e mapa di Merca lo a mustra si solamente Milennials nan lo a vota? Clinton lo a gana hands down. Nos no lo tin e atrocidad di Trump riba e plataforma mas grandi di mundo.

Baby Boomers nan tempo ta cabando, e generacion cu a disfruta di beneficionan economico cu nos Milennials solamente por soña cu ne. Esunnan cu tin 40 aña na un mesun trabou y no sa con duro e ta pa haya un trabou decente awendia. Esunnan cu ta bisabo “Unda bo tabay cu tur e buraconan ey den bo cashon”. Tendemi Buchi Juan, stop di worry cu e buraconan den mi cashon y enfoca riba tur e buraconan cu boso a crea den e economia. Move pa caba cu bo pensamento di temp’i Lago. Nos ta wardando pa nos chens, nos tin leynan pa adapta. Ayo.

 

 

Leave a Reply