ehm-no

UTRECHT – 9 di cada 10 biaha mi tin cu hala rosea profundo, pensa riba mi futuro bisa mi mes cu mino por cambia mundo si mi ta den prison. Pero mi hendenan, boso tur tin cu stop.

Wel no tur, pero mayoria. Bo no ta radical y bo no ta un revolucionario tampoco y ta ora pa bosa esey.

E miho cos cu a pasa pa motibo di internet ta cu el a duna tur hende un plataforma pa papia.
Den un manera of otro, el e sera un buraco grandi den e manera con hende ta obtene informacion,

Pasobra awo e mesun tipo di informacion ta accesibel pa casi tur hende. E pio cos cu a pasa pa motibo di  internet, ironicamente tambe ta cu el a duna tur hende un plataforma pa papia. Awo nos ta biba bidanan yena cu video y meme’s cu subconscientemente ta cambia y influencia e manera cu nos ta mira cosnan. Algo si, awo tur hende ta poeta, awo tur hende ta activista social, awo tur ta comediante

y tur ta Dr. Phil.Oprah, Joyce Meyer, modelo, politiconan profesional etc etc.

Poco dia pasa, mi a bay off riba un di e vloggers nan mas popular di Hulanda. Un señora cu yen siguido online, cu su manera ‘pret’ di conta storianan violento y su manera di pusha palo bou candela a causa furor riba medianan social. E señora aki tabata papiando di relacionnan abusivo y con hombernan ta bati muhenan, con e victima mes gusta, con muhenan cu no ta core bay di relaccionnan abusivo ta “lolo” etc.

Rabia cu e manera cu e tabata culpa victima pa nan abuso mi a bay bisa e cu pakico e no ta considera uza su plataforma pa yuda muhenan cu ta sufri di violencia domestico na luga di sinta culpanan pa locual nan ta pasa aden y pa violencia di un homber.  Pa mi sorpresa, el a contestami. Algo rond di e frasenan “Ik begrijp je, maar ik ga gewoon niet lief doen. Toen ik een kut relatie zat, heeft niemand tegen mij lief gedaan. Dus met mij is het gewoon tough love! Sommige vrouwen houden gewoon van”. Mi a wak e comentario pa un of dos ora y mi a dicidi di no sigui discuti cu ne.
Y esaki ta pakico, esaki ta pakico experiencia  no ta haci tur hende un experto y djies pasobra bo a pasa den algun cos no kiermen bo por bira un stem pa otronan cu a pasa den algo similar. E muhe aki claramente no ta equipa pa duna niun hende conseho di con pa anda cu abuso, ni tampoco tin e capacidad di comprende cu abuso ta otro pa tur hende y no ta tur muhe tin e modo pa djies cana bay. Pero, e mas tristo ta cu no ta e so, te hasta riba Aruba tin hopi di e “self proclaimed radical y revolutionaries”  aki. Hende ta sigui pep up e ignorancia, e señora aki ta hura cu e ta revolucionario, cu e ta inspira hende pa ta nan mes, cu e ta bisa cosnan cu hopi hende ta pensa pero no tin durf di bisa.

Awo, tur ta radical, tur ta revolucionario y mas likes y shares mas nan ta sinti cu nan ta haya validez. Popularidad ta crece y cune nan ego, nan tin mucho followers pa un hende por bisanan algo. Ignorancia y “popular culture” ta keda crusa caminda y nos ta sigui masalmente sin cu e ta hiba nos algun caminda. Nos tur ta conecta, pero cu kico precies?  Manera Zahira Kelly ta bisa

“Tur cos cu ta micro ta macro, pasobra e sistema di poder grandi ta wordo componi pa hopi cos chikito”.Ken abo ta sigui online? Pakico? Den ki manera e ta cambiando bo bida? Con bo ta wordo influencia? Bo tambe ta aki fo ta bisa cu muhenan ta scoge abuso, bo tambe ta aki fo ta pensa cu hende ta scoge pobresa, bo tambe ta aki fo ta pensa cu tur hende tin mesun oportunidadnan?
Wak Hitler cu Donald Trump, un hende por tin miyones di followers y esey no kiermen nada.

“Tanto hende no por ta fout”. Eingelijk si, nan por, e termino ta ignorancia collectivo.

Leave a Reply