donald-geer

 

UTRECHT –  Mi a bisa universo cu mi tabata mester un momento leu di mundo y boom mi celular su charger a kibra. Tene cuidao cu kico bo ta pidi, pasobra e chance ta cu bo tabay haye. Tune in den mundo real y tur hende ta cla pa bula di un seroe? Trump, Geert, Zwarte Piet?  Awo si mi ta comprende Jay Z ora e ta rap “I Got 99 problems”

Mi tabata na Lisboa, Portugal tur cos tabata leuk te ora mi a lanta y haya sa cu Donald Trump a gana. Awo, misa cu America ta conoci pa ta un circo y pa semper pone nan mesun cara na berguensa, pero esaki a manera nan ta bisa a  “take the cake”. Tur hende a pensa cu Trump tabata un joke, pero den tur joke tin un tiki berdad. Y awo Americanonan a bay di un lider stima pa hopi na mundo. Pa un hende cu tabata tin e plataforma di mundo henter y no a haya mas cu cosnan racista pa bisa. Tin hopi theoria pa kico Trump a gana, mil y un articulo despues porta esun cu tin mas logica, ta di un periodista riba Twitter esta Siyanda Mohutsiwa

cu tabata papia di a sigui e movimento di “Reddit” online pa mas cu 3 aña y wak subsecuentemente con hopi hoben adulto di circulonan elite, a drenta e grupo pa discussionan sano y tips pa basila, pero na su luga a wordo manipula pa vota pa Trump. Pero no ta esey so, nan a wordo avisa pa wanta esaki pa nan mes pa evita wordo ataca. E ta conta cu e hobennan aki a wordo bendi e idea cu feministanan, activistanan social y demas grupo di revolucionarionan ta e berdadero facistanan. Nan solamente tey pa hortanan di nan masculinidad y poder y cu e unico manera pa ta hombernan di berdad ta pa medio di vota pa Trump. Trump a gana e voto di e young elite y e college educated whites. Pues e idea cu bo no porta racista si bo ta bon educa por muri numa. Awo cu Trump a gana, nan ta fiesta silenciosamente tambe.

 

Otro cos cu tambe a wordo bisa, ta cu nan ta kere cu Trump su victoria lo tin un domino effect riba elecionnan cu ta bin awo na Europa, ironicamente un di e prome hendenan cu a
felicita Donald Trump riba su victoria y yama e triunfo di Trump un inspiracion pa Europa ta Hulanda su mesun Geert Wilders. E homber aki ta manera nan ta bisa “on the rise” y recientemente el a pone riba Twitter cu mester duna Hulanda bek na Hulandesnan pasobra e ta nan pais y cu na 2017 esaki lo pasa si Hulanda vota pe. Poco tempo pasa tur rond di Hulanda tabata tin posters pa un obra teatral, riba e poster tabata tin skirbi. “Wilders su solucion, dip tur cos den clorox”. Tendemi ki Geert, ma mula mucho hopi pipita pa e passport ey. Den un tono mas serio, cos simplemente no ta pinta bunita, hopi hende ta spanta, e agressionan na muslims y hende di color na Merca ta foy control. Bou di hashtag #TrumpsAmerica hende a cuminsa comparti nan experiencianan cu racismo y xenophobia, despues cu Trump a gana.

Aruba, podise ta kere e ta salvo di tur cos, cu tur e odio cu e politiconan aki ta infiltra hende cu ne, no tin ningun efecto pero wak den nos comunidad mes, nos no ta ni papia di con nos ta trata minoria. Nos a discuti Zwarte Piet pa dos dia y a dicidi cu e tradicion ta sigui normal y no tin nada malo cune. Diabierna pasa, aki na Hulanda activistanan kier a protesta Zwarte Piet pacificamente, nan a sera nan tur den autonan di polis pa oranan largo. Polis a bati algun hende cu klop tambe. Atleast na Hulanda, tin un grupo cu ta hopi conciente di nan opression y ta luchando pa cambia esaki. Pio ta cu na Aruba, poco local a post cu nan ta feliz cu Trump a gana y cu nan ta spera algun dia Aruba conta cu un lider cu lo saca tur e latinonan afo tambe. Na final di dia, e problema cu e politiconan aki no ta cu nan ta racista, e problema ta cu nan ta racista cu un plataforma y poder. No tin pio ciego cu esun cu no kier wak. Di mi parti, mi ta cansa, mino kier ni cumpra un charger mas, laga e telefon morto pa semper. Mi ta sinti manera un CD rasca cu ta keda ripiti e mesun cantica di semper, pero niun hende ta memorisa esaki. Mi ta biba “Den mi Cabes” berdad y te hasta eyden  nada ta sigur. Union ta haci forsa, pero union kiermen igualdad y ta hopi no kier esey. Hende lo vota mas lihe pa mantene nan derecho di ta privilegia, na luga di yega na un punto unda tur hende ta conta cu e mesun privilegio. Un djies, nos tambe tin election na Aruba, pa ken abo tey vota?

 

 

Leave a Reply