time

 

UTRECHT – E ta cla cu mino tabay Aruba december pero mi ta sigur cu mino ta e unico studiante cu tur dia ta pensa, wel kico mi tabay haci pasco? Kico mi ta bay haci aña nobo? Ora bo ta biba cerca di bo famia simplemente bono ta pensa riba e cosnan ey.
E ta algo cu bosa automaticamente.

Un tema un tiki pafo di lo comun, despues di tanto racismo, politica, feminismo, abuso y bomboshi. Miso ta pensa akinan, algun cos ta pasa cu edad y algun cos ta pasa cu tempo. Mi ta corda ora mi a yega Hulanda augustus di 2015 mi tabata tin mi plan. Mi tabata sigur kico mi tabata bay haci, con mi tabata bay supera mi mes. Por fast forward un aña y algo despues y mi ta sinti mescos cu tur e Arubianonan cu tin mucho tempo na Hulanda. Tiki tiki pero sigur, mi “sauce” y entusiasmo ta bayendo. Podise ta e winter, podise ta edad, ken sa?  Mientras e chispa ta paga, realidad di bida ta drenta. E dianan ey cu mi tabata por bisa
“Ora mi bira grandi mi kier ta…”  a pasa bay lagami manera nada. Un djies niun hende por “kijk door de vingers” y bisa “ah, bo ta djies jong”. Pasobra asina bo crece, responsabilidad ta cuminsa bati na bo porta. Cada acto ta bin cu su consecuencia y ta bo mes tin cu carga cu nan.

Tempo mi tabata tin algun 15 aña ney, mi juffrouw di scol a menciona algo cu yama “the age of reason”. Segun e, e tabata e edad unda cosnan ta cuminsa perde sentido y haya un significado nobo. E ta e edad unda bo innocencia emocional ta bay. Mi juffrouw a comenta: “Si bo tabata kere bo por a conta cu dies hende, esaki ta e edad unda bo lo ripara cu podise bo por solamente conta riba dos y un di e dos nan ey ta bo mes”  El a contami con e edad aki, cual por cierto ta varia pa tur hende, por kibra bo curason y con bo lo realisa cu crece solamente kiermen haci locual ta miho pa bo mes. Mi ta kere cu locual mi ta purbando di remarca ta cu tin ora nos ta asina pura pa crece, asina entusiasma pa e siguiente etapa den nos bida cu nos ta lubida di biba den e momento. Nos ta lubida di stop y sinti e bunitesa di e momento ey, pa imperfecto cu e por ta y prome cu bosa bida a pasa bo dilanti.

Tempo mi tabata tin 15, mi tabata loco pa haci 18, ora mi a haci 18 mi tabata pura pa yega 20 y awo cu mi tin 23 mi ta pura pa caba universidad y cuminsa cu mi carera pafo di academia. Edad ta cambia e manera con hende ta tratabo, pero tempo ta cambia e manera cu bo ta trata bo mes. Mi mensahe e siman aki ta pa nos tur tuma un tempo pa biba den presente. Stop di worry asina tanto cu cosnan cu nos no por controla, laga bay, stop di hoga den un glas di awa.

 

Leave a Reply