UTRECHT – Entra mas tragedia pasa, mas humanidad ta lagami na caya. Pero ki haci? Pusha bay dilanti y resa pa tiki luz pasobra Dios mio! Mi ta sinti manera un pastor cu ta keda predica e mesun pagina di bijbel. Mi ta pensa, como hende, nos djies mester por ta miho.

E headlines di noticia e siman aki tabata un desaster, mas sin embargo mi mesun “Den mi cabes” tabata practicamente bashi. Podise mi curason simplemente tabata mucho kibra pa Haiti cu a wordo asina bati pa horcan Matthew, pa Kim Kardashian kende a wordo atraca pa un grupo di homber distingui como polis y pa e pueblo Americano cu tin cu scoge entre Donald Dumb y Killary Clinton. Sin laga afo e sin fin di articulonan y postnan violento cu mi ta wak tur dia. Kidia nan ta cuminsa tuma voluntario pa bay Mars atrobe?  E frieu tin mi cera na cas y inspiracion pa skirbi no t’ey mucho presente, pero como escritora al fin mester saca inspiracion di unda no tin y cumpli.

Tempo nan a abusa di e polis femenino na Aruba, mi a skirbi un articulo tocante con un “victima perfecto” no ta existi y no tin ningun sciencia den keda culpa un hende pa desgracianan cu ta pasa cu nan.  E argumento tabata “ e tabata merece pasobra el a bira burachi”.  Kim Kardashian aparentemente ta mucho rico pa compasion humano y segun medianan social e tabata merece locual a pasa cu ne “pasobra e ta show off mucho”. Sin tuma encuenta cu e muher tin dos yiu chikito ta warde na cas y e situacion por a caba pio.

Haiti tin un historia largo di brujeria, un di e paisnan mas pober na mundo, pero atrobe
“Horcan Matthew a pasa asina paso nan ta haci voodoo”. Skirbiendo e cosnan aki so mi stoma ta bira. Y minosa si e ta algo di awo, minosa si antes hende tabata worry mas y si tin internet cu ta “wire-less” a haci nos “heart-less” den e proceso.
Un cos so mi tabay bisa, e unico cos cu ta haci nos humano ta e echo cu nos por sinti compasion pa otro. E ta ridiculo kico tur nos ta pidi di hende pa nan por tin nos compasion.

E ta ridiculo con nos ta kere e ta nos luga pa bisa kico ta justo y kico no.
Hende kier pa victimanan ta santo, mientras cu nos tur ta ser humano cu nos fayonan y nos virtudnan. Ruman, si bo ta wak un hende sufri y bo prome instincto ta pa cuminsa busca motibo pakico e merece e dolor, bay biba boso den un mondi, sociedad no mester dibo. Ayo.

 

yakari


 

 

Leave a Reply