yakari

 

UTRECHT – Mi ta corda con el a sinti pa habri Facebook y wak yen potret di un homber sunu riba mi newsfeed. Un otro caso di pedofiel, un otro noticia cu ta duna claridad na kico ta pasando den nos sociedad. “Homber haya cu mucha menor di edad den auto”.  Un frase cu te ainda no a laga mi pensamento.

 

Mi mama ta lesa mi columna religiosamente, el a bisami cu un dia nan tabay corta mi lenga pa cosnan cu mi ta skirbi. Mi ta pensa di muri mi tin cu muri di un manera, pues si mi muri pa un causa sikiera mi bida no tabata envano. Ban papia serio si, lagami conta bosa un storia.

Tempo mi tabata tin un 9 aña ney mi tabata hungando pafo den mondi cu mi 2 amiganan ora cu un homber den un pick up shinishi a para horizontalmente nos dilanti, habri su porta y cuminsa masturba. Yen miedo nos a core bay cas, nos a priminti otro di no bisa nos mayornan. Pero pakico? Pakico nos tabata tin asina hopi miedo di denuncia algo cu den ningun manera tabata nos fout? Pasobra nos tabata tin berguensa, pasobra nos pensamento inicial no tabata “e homber aki ta fout y e ta haciendo algo malo nos dilanti”. E tabata “wel, ki mishi nos ta hunga pafo di cas”.  Culpa nos mes, algo cu hopi victima ta haci. A nos sikiera core bay, pero ken por a kita cu e homber por a uza su forsa tira nos tur 3 den auto y abusa di nos? A nos a core cu suerte.

 

Algo cu si mi por bisa, cu hopi siguridad ta cu nos mester cuminsa scucha muchanan.
Desde chikito, kibra e taboo di cu tin cierto cosnan no por wordo papia di dje. Muchanan ta wordo lanta pa tin miedo di nan mayornan na luga di confianan. E idea cu un hende grandi su palabra of opinion tin mas balor cu esun di un mucha, ta locual ta haci cu nan ta abusa nos muchanan y nos ta haya sa te ora ta mucho laat. Ta hopi tiki mucha ta wordo stimula pa papia y uza nan stem. Mayornan ta duna nan yiu un Ipad y corde cu e mester cuida esaki tur dia, pero ta lubida di bisanan cuida nan curpa. Baña e mucha den pura mainta sin analysa e mucha su curpa, sin puntre si e tin dolor un caminda. E ta cosnan cu ta zona obvio, pero bo lo keda sorprendi cuanto mayor no ta haci esaki. Mino ta un psycholoog, ni un experto riba con ta anda cu un asunto asina delicado. Mi solamente tin hopi opinion y un espacio den corant. Algo si, na final di dia, hopi personalmente ami ta kere cu e rais di e problema ta cu tin un diferencia inmenso riba con sociedad ta lanta mucha homber versus con nan ta lanta mucha muhe. Mucha homber nan ta wordo laga liber desde chikito mientras cu mucha muhenan ta wordo protehi. Nan ta bisa mucha muhenan desde trempan cu hende homber ta cacho y nos mester tene cuidao di nan, Pero nan no ta bisa mucha hombernan pa mira hende muhe como figuranan cu potencialmente por causa nan daño. Ora mucha muhenan ta crece scuchando cosnan manera “no bisti saya cortico, no keda te laat riba caya, no provoca hende homber”. Y mucha hombernan ta wordo bisa cosnan manera “no yora ta homber bo ta, stop di ta sensitivo, stop di ta shishi manera muhe”. E ora con nos ta spera pa nan bin cerca nos ora cu hende mal uzanan, si tur ora nos ta ponenan sinti culpabel, na luga di sinti protehi. Bo ta kere di berdad nos tin derecho di punta dede riba gobierno pa e manera cu muchanan ta wordo mal uza? Nos ta grita pa nan hisa e ley di castigo pa pedofiel, e berdad ta cu e ley a wordo cambia. Locual ainda no ta cambia aparentemente, ta e cultura di culpa otro hende, e cultura di tira tur cos den scochi di otro y no tuma responsabilidad pa nos muchanan manera mester ta. Un ley ta un arreglo poni preto riba blanco. Pero kico un ley di berdad ta haci pa e stabilidad mental di un mucha cu a wordo abusa, kico e ley tabay haci pa e berguensa cu e famia di un mucha cu a wordo abusa ta sinti? Nos ta trata muchanan manera posesionnan na luga di ser humano, e ta algo cu mi ta keda ripiti. Y te ora nos no duna muchanan nan stem, te ora nos no siñanan e poder cu nan ta posee y nan autonomia riba nan mesun curpa, e cosnan aki lo sigui pasa. Si e mucha no kier cana brasa tur hende den famia, lage. Esaki no ta haci e mucha malcria, e no ta haci e mal educa. Abuso, masha poco ta bin di un hende straño. E ta pasa den seno familiar, mayornan tin cu keda alerto semper.

 

 

nota : E texto aki no por wordo publica ningun otro caminda sin permiso.

 

Leave a Reply