ORANJESTAD-  ‘Tur feminista ta gordo y mahos’ mi ta lesa riba un meme cu ta circula rond den internet cu e potret di un muhe curpa yen riba dje. ‘E muhe feminista ney tur odia homber, tur ta lesbiana’ ta palabranan cu hopi biaha mi ta encontra cu ne ora mi ta purba discuti femenismo cu hende. Mi sexualidad ta wordo cuestiona constantemente.

 

14362727_1140537132689188_8913299069447350500_o

E ta parsemi cu hopi hende tin un imagen hopi negativo di e palabra feminismo,

E ta yega na e punto cu hopi muhe tin miedo di pone e ‘label’ di feminista riba nan mes
Aunke cu e ta un movimiento cu directamente ta traha contra e opresion di hende muhe den sociedad. Algun luna pasa mi a puntra un di juffrouwnan na Hulanda. “Teacher are you a feminist?”. El a responde “Ofcourse I am!”. Asina, sin pense dos biaha. E no a drenta den mucho detaye. Mescos cu na Aruba tin anochi poetico, na Hulanda mi a bishita hopi anochinan literario cual centro di dialogo semper tabata feminismo. Mi a topa cu tur cos desde muhenan cu a para riba escenario y papia di con henter nan bida nan a wordo acosa pa nan pecho grandi, te na muhenan cu a traha canticanan tocante menstruacion y ovulacion.
Pero un cos tabata cla desde principio ta cu Hulanda, riba su mes ta considera un pais feminista. Semper mi ta sinti un orguyo ora mi ta drenta un bus y tin un conductura na luga di un conductor. Ora mi drenta trein y e stem cu ta sali di e speakernan ta uno femenino. E ta ponemi sinti inmenso. Mescos cu ora nan tabata reconstrui e caminda dilanti di Renaissance Mall y mi a ripara cu den e trahadonan cu tabata pega klinker tabata tin un hende muhe.

Feminismo a wordo manipula y ridiculisa asina tanto y no ta di descarta cu ta hopi locura a wordo cometi bou di e nomber di feminismo. Pero djies pasobra un grupo di hende muhe kier a laga nan cabey di kokedek crece pa despues tinja esaki di color y yame un trend feminista,
No por descarta kico feminismo ta para y lucha p’e. E ta simpel, pero complica pa comprende ora bo wordo condiciona pa pensa henter bo bida cu un hende homber ta e imagen di liderasgo y forsa y un muhe ta eynan pa duna amor y sosten. Den conversacionnan cu un homber hopi mas grandi cumi, el a puntrami kico mi tin den mente despues cu mi caba universidad. Mi a conta e un poco di mis planes y mi a menciona cu mi kier opera di un manera cu mi ta conecta muhenan poderoso cu otro pa nan por network y crece hunto.
El a bira puntrami “pero con bo kiermen? Esey no ta interferi cu bo preferencianan sexual? Bo odia homber? Pakico muhe so?”  Mi tabata asina sorprendi na e manera cu feminismo ta wordo afilia cu lesbianismo dibiaha. Mientras cu e no ta asina y na mundo tin homber feminista tambe. Mi tabata purba di splica e meneer cu mi idea ta mas basa riba e echo cu muhenan ta wordo lanta pa wak otro como competencia, cu mi kier traha di un manera cu muhenan ta afera na otro pa crece na luga di bringa otro. E no tin nada di haber cu odio, e no tin nada di haber cu preferencia sexual. Si no, cu pa hopi largo e status quo tabata cu hombernan por forma un ‘brotherhood’ den cualkier ramo cu nan ta opera y muhenan ta forma un competencia. Wak, ami no por forsa mi ideologia riba niun hende. Pero ora hende comprende bon kico e ta y pakico e ta necesario den un mundo unda cu muhenan ta muri constantemente na man di homber cu ta kere nan ta donjo di nan. Bo lo ta un feminista sin necesidad di uza e label ey mes. Kico e ta di berdad bo ta puntra? E ta facil. Igualdad entre sexonan riba un nivel sexual, politico y economico. Feminismo ta bringa pa un mundo unda cu hende no ta presumi cu un muhe ta yega top pasobra el a drumi cu un homber poderoso si no mas bien pa su propio capacidad. E ta bringa e idea cu muhenan no por ta lidernan grandi den companianan paso nan ta ‘mucho emocional’. Cu muhenan ta na mundo pa reproduci y e muhenan cu pa un of otro motibo a dicidi cu tin yiu no ta pa nan ta wordo yama ‘incompleto’ of ‘amarga’. Feminismo ta respeta muhenan cu kier keda cas cria nan yiunan mesun hopi cu esunnan cu kier conoce mundo y haci un carera. E ta reconoce cu muhenan di color tin diferente retonan den bida cu muhenan blanco ora e ta yega na trato den ramonan profesional.
E ta bringa e idea cu homber no tin cu yora y e ta duna validez na e stem di hombernan cu no kier ta mes ‘macho’ cu sociedad kier pa nan ta. Y tin hopi mas, pero ta un pagina so mi tin den corant.

Leave a Reply