ORANJESTAD – Tin biaha hende ta haci cosnan cubo y bo ta pensa ta con bo tabay haci pordona. Con bo tabay sigui cu bo bida, despues di a pasa den cualkier mal experiencia cu por ta a laga un smaak amargo den bo boca. Bo ta keda bira riba kico bo ta sinti, pero bo a sinta cuestiona pakico e otro persona a actua di tal manera.

 

Mi ta pensa cuanto biaha nos ta jusga hende pa con nan ta deal cu dolornan cu a nos personalmente nunca a sinti. Y nos ta bisa “wak e con e ta bebe, con e ta droga, con e ta laga su yiunan”. Tin ora sin cuestiona nan pakico of nan dicon. Tempo mi tabata tin algun 10 anja ney mi ta kere mi a scucha den un pelicula cu lo unico cu ta haci nos humano ta cu nos tin e abilidad di sinti compasion pa otro. Compara cu bestia cu djies tin cu sigura pa nan come y un ta mata otro sin wak atras. Poco dia pasa, un amiga cercano tabata contami di su amistad cu un amiga di dje.Con e ta pensa cu e ta duna su 100% y hasta mas pa su amiga y e no ta haci mescos.

El a bisami “Bosa, mi ta haya rabia con e tratami pasobra ami si semper ta eynan p’e. Ami semper ta fia e cos, ora e tabata pasa den malo ta ami a yud’e. Y e ta trata ami manera cu mino ta cos di confia”. Mi amiga den su rabia tabata bisa hopi cos, pero tabata tin un palabra cu e tabata keda menciona y esey tabata “ami, ami, ami”. Pasobra den su rabia y su disgusto no tabata mas luga pa locual un otro hende ta sinti. No tabata tin luga pa analysa su amiga su pasado, su presente, ni cual situacion lo a hiba e na no confia ningun hende.


Te hasta hende cu a haci tur cos pa mustra cu nan ta di confia. Nunca mi amiga a cuestiona kico por a haci su amiga asina friu cu ne. E ora mi a cuminsa cuestiona, no solamente mi amiga y su otro amiga. Pero mi mesun bida, nos sociedad, con egoismo a bira normalidad. Cuanto biaha nos ta laga hende bon bay, simplemente pasobra ora cosnan a yega un final nos a pensa solamente riba locual nos ta sinti, Sin tene nan sentimentonan den consideracion. Esaki no ta bisa cu tin ora hende ta egt destrui tur cos y no tin manera di pordonanan mas y no tin con justifica nan comportacion tampoco. Pero en general, pakico relacionnan ta caba na malo mayoria dibiaha? Paso nos ta egoista pa esey. Pasobra nos drenta relacionnan amistoso y amoroso pa beneficia nos necesidad na luga di otro, pasobra nos tin un bashi cu nos kier yena. Nos ta kere cu nos sentimentonan ta otro hende su responsabilidad.

Y si bo ta drenta un relacion pa beneficia bo mesun bida, na luga di esun di e otro,

tin un chens hopi grandi cu bo lo hayabo mal sirbi.

 

 

Leave a Reply