ORANJESTAD – Ta yega un momento, caminda bo tin cu tuma responsabilidad pa bo propio existencia. Ora bo ta hoben, bo ta yena cu algun privilegio cu hende grandi no tin. Esaki ta cu hende den hopi ocasion ta hustifica bo erornan pasobra bo ta hoben y segun nan bo no sa miho.

Pero hubentud ta un perfume caro, cu ta caba hopi lihe. Como persona, hopi biaha nos ta kere cu nos fam, nos famia y nos pasado ta defini ken nos ta. Locual nos como hende mester cuminsa realisa, ta cu ta yega un punto den mundo cu nos mester stop di culpa tur otro hende pa tur locual no a bay bon den nos bida. Laga bay di gobierno, laga bay di bo mayornan, laga bay di ruman y pareha y yiunan como tambe amigonan. Stop di sinta riba mannan cu tin e poder pa traha perfectamente wardando pa otro hende duna nan e permiso pa opera. E ta facil pa sinta riba un stoel y culpa miguel, jose, maria, miguelito, juana, buchi y pancho pa tur locual ta bay fout den sociedad y nos bida diario.

E ta facil pa culpa hefe nan di trabou, culpa compania, culpa e tempo, culpa dios, culpa mala suerte. Hustifica nos desgracianan cu excuus nan cu barata of ridiculo. Mi por sinta akinan y skirbi nan un pa un. Tur e motibonan pa kico hende ta kere nan no ta bay dilanti. Tin situacionnan fastioso, esey ta berdad. Tin situacionnan cu ta pone nos sinti cu nos tin man y pia mara na un stoel y nos no por move. Pero tin algo na e mundo aki, mi ta kere esaki ta e unico cos na e mundo aki. Cu nunca ta fuera di nos control. Tin algo den e mundo aki, cu aunke bo ta hinca den e di 8 vloer di fierno nada ni niun hende por mishi cu ne. Nan por descurasha bo, yama bo pa nomber nan baho, menosprecia bo. Por tira bo auto stima riba suela y trapa riba dje bisa bo cu bo no ta bal nada.

Pero paden di bo, tin algo cu ta intocabel por lo menos cu bo duna cosnan exterior e poder pa mishi cu esaki. Locual mi ta papia di dje ta bo actitud. Riba e internet, riba un di mi dianan laf mi a en contra un escritora cu tabata bisa “The same boiling water that softens the potato also hardens the egg. There for, its not the circumstances that matter but what you are made off”. Den nos dushi papiamento esaki ta traduci na: “E mesun awa herbiendo cu ta pone e batata bira moli, ta pone webo bira duro. Pues no ta e circunstancianan ta importa si no di kico abo ta traha.”

Tin cosnan cu gobierno por resolve, tin cosnan cu nos mayornan por a haci miho ora nan tabata cria nos. Pero abo por tuma responsabilidad pa bo propio existencia, ora e punto yega cu ni minister, ni mami ni papi por bisa abo nada mas. Bo por sinta y keha cu instancianan no ta haci nada pa bo, of bo por saca forsa di boluntad y haci algo pa bo mes. Bo por keha cu gobierno no ta sirbi, of bo por inverti den bo mes di tal manera cu bo por biba un bida cu no ta depende di gobernacion. Como sociedad, ban uni hunto y stop di warda hende, gobierno of otro hende por haci pa nos. Wak den spiel tur dia y purba di haya sikiera un solo cos cu abo so por haci pa bo mes. Algo cu niun otro hende por haci pa bo. Traha riba bo mes como persona, paso tur e materialnan pa drecha bo bida ta paden di bo y no pafo di bo. Den e mesun momento aki, e no ta importa di unda bo bin, kico bo tin, kico bo no tin y kico bo falta.

Riba e mesun momento aki tin algo den bo, cu abo so por cambia y esey ta bo actitud. No tin forsa di boluntad ta lo unico cu por wanta un hende atras. Si di berdad bo kier un bida bon pa bo mes, si di berdad bo kier miho pa bo famia, pa bo pareha, pa bo sociedad y pa bo hendenan. E miho manera di haci esaki ta pa lanta ariba y bira e ehempel. Bo kier tin yiunan cu ta sigui nan soñonan? Sigui esunnan di bo y nan lo siña di bo. Bo kier bo pareha trata abo miho? Stop di acepta su maltrato. Bo kier bo yiu tin un miho calidad di educacion? Duna e tempo y atencion. Y asina mi por sigui, pero tur cos ta causa y efecto. Aunke tin un lista grandi di situacionnan den bida cu nos no por controla, tin un cos cu nunca lo drenta e lista ey y esey ta nos actitud.

 

(Publica den Bon Dia Aruba 27 february 2015, no por publica otro camina sin permiso)

Leave a Reply