ORANJESTAD -Clara tabata un muher comun y coriente, simpel y amabel. Riba un dia nada special el a dicidi di yama su amiga y puntra e pa e top’e na un restaurant pa un tiki ‘girl talk’.

Clara a yega prome, el a pidi un bebida y sinta warda trankil warda. Despues di algun mey ora sinta e waiter ta puntra Clara si e ta cla pa pidi algo, Clara ta bisa e cu e ta wardando su amiga yega. E waiter incomodo ta cana bay. Mas tempo a pasa y atrobe e waiter ta bin puntra Clara si e ta desea algo y Clara ta ripiti su contesta. E waiter no tabata mustra masha contento cu Clara y tabata keda dun’e un cara di disgusto. Wel, Clara su amiga a yega porfin. Un hende muhe cu tabata bunita, exitoso y hopi respeta den comunidad. E waiter a bin bek cu asina un sonrisa riba su cara. Su actitud a bay di 0 pa 100 mesora y diripiente el a cuminsa brinda Clara un servicio di 5 strea.

 

Y esaki ta berdad di nos sociedad, subconscientemente nos actitudnan ta cambia cu hende pasobra nos a wordo condiciona pa trata hende segun nan clase social.

Percepcion di poder ta pakico ora e hefe drenta trabou tur hende ta sinta strit y ora e hendenan cu ta haci limpi pasa dibaina nan ta wordo cuminda. E ta locual cu ta haci asina facil pa nos desprecia otro.  E ta pakico nos ta grita y insulta e enfermeronan pero kere y respeta e palabra di un dokter. Paso den nos cabes nos tin hinca cu e dokter a traha duro y largo pa yega unda e ta y enfermero a djies tuma locual el a haya. Paso como humano, nos simplemente ta pensa cu bida ta depende riba con hopi otro ta kere nos merece. Sin tuma den cuenta cu no ta tur hende tin e mesun acceso na cosnan manera un bon educacion, cuido medico, seguridad, amor, etc.

E ta pakico nos no kier lesa e status di Facebook di un hende cu mal gramatica y ta prefera di no duna atencion na kico e ta purbando di bisa. Pero corda cu na final di dia, un hende por tin un gramatica perfecto y con cu bay bin manda un mal mensahe. E idea cu tin hende nan bida simplemente ta bal mas, no solamente ta uno cu ta bin di un mundo capitalista, pero e ta uno injusto tambe. E punto final ta cu locual cu den nos percepcion ta ‘menos’ pa un otro hende e por ta tur cos. E dokter mester a studia duro berdad, pero nos no sa kico tin tras di enfermero su storia. Nos no sa kico tur el a pasa aden pa yega unda e ta pa ‘menos’ cu por considera cu e ta. Porta e senjora cu ta haci limpiesa  ta yega trabou tur dia contento cu e tin un trabou pa cuminsa y e hefe grandi ta biba frustra pasobra e tin cu controla su trahadonan. Y e no ta bay pa trata tur hende mesun cos, paso como humano husga ta algo natural y cierto personalidadnan semper lo haya e miho parti di nos. Pero mas bien e trata di duna tur hende e beneficio di duda, di bisa ‘mino conoce bo, pues mi no tabay pretende di sa kico tur bo a pasa aden y pakico bo ta unda bo ta’.

 

Leave a Reply