Creciendo, semper mi mama tabata bisa mi cu mi tin hopi suerte cu el a trece mi aki na Aruba y cu e no a laga mi atras na Santo Domingo y djis manda mi placa manera hopi otro mama Latino ta haci.

 

11401077_10153278197073991_375418239498172512_n

Ora nos tabata bay bek Santo Domingo vakantie, e tabata yora ora di bin bek. Nunca mi no por a comprende dicon, pero e siman cu a pasa m’a biaha bay mi so, m’a keda pa un siman y porfin mi a comprende mi mama. Mi a compronde pasobra e biaha aki ami ta esun cu a yora. Pasobra e biaha aki, mi a wak mi pais di nacemento pa medio di mi propio wowonan. Mi a wak e y formula mi mesun criterio sin tin mi mama su stem bisando mi yen cos den mi cabes. Pa prome biaha di berdad mi a tuma un momento pa soak in e pobresa na Santo Domingo, e cayanan sushi e muchanan riba caya. E no tabata drenta mi cabes, con hende tabata riesga nan bida djis pa por come algo tur dia. Di berdad muchanan di 14 y 15 aña memey di un autopista caminda autonan ta core 100 km pa ora, bendiendo cos dushi, labando glas, etc. Muhenan cu ta haya mas yiu cu nan por cria, scolnan cu ta asina chikito y limita, salarionan mediocre pa trabounan duro y un costo di bida, cu segun mi lo keda subi.

Awo, akinan ami ta na Aruba, mescos hopi otro, tin ora mi ta sinta riba mannan cu hopi otro hende lo uza si solamente nan lo tin e oportunidad.
Mi a bin bek y awo mi ta demanda di mi mes, haci cosnan na un miho manera, no pasobra mi por miho, si no pasobra mi tin tur recurso pa haci miho. Pa ora mi kier a sali di mavo na 2010, hopi di mi amiganan a cuminsa sali na estado caba. Pa ora mi kier sali di Colegio na 2012, hopi tabata na caminda pa tin baby number dos caba y asina tiki tiki mayoria di mi amiganan a bira estadistica. Manera nan ta bisa cu e averahe di mamanan hoben ta haya un otro yiu den e prome dos añanan despues di a haya e prome. Y pakico? Kico ta e necesidad di tin 20 aña y tin 2 of 3 yiu? Nan cu ta asina yena cu privilegio, cu tin 4 idioma den nan boca, cu tin oportunidadnan pa un bon studio y un bon calidad di bida. Claro, cu no ta tur mucha muhe cu ta bira un mama hoben ta laga scol y bay traha pa un salario minimo. Pero e ta duro, e ta sumamente duro. Hopi di e mucha muhenan aki, ta wordo laga nan so cu nan yiunan y e ta duro. Y mi no ta bisa esaki manera un mama hoben, pasobra mi no ta un. Pero mas bien mi ta papia di e punto di bista di e yiu di un mama cu tambe mester a cria su so. E no ta facil, wak mi mama traha 2 trabou pa hiba su mes y ami dilanti, e no ta facil. Pasobra mi mama tambe, mescos cu hopi otro mama soltero of mamanan hoben mester a sacrifica tur cos pa por sobrevivi. Mi mama no tabata tin, ni hamas lo tin, tur e privilegio cu hopi muhenan Rubiano tin. E no tin 4 idioma, e no ta bin di un luga unda gobierno ta financia studio pa esunnan cu no tin modo, e ta bin di un bario chikito caminda nan ta mata hende den pleno luz di dia y tur cos ta sigui manera cu nada no a pasa.

Dicon nos ta kedando atras? Dicon nos ta sinti mescos cu e isla ta cayendo den otro? Dicon nos ta keha cada bes cu Latino bin di afo y e si haya un trabou y e mesun Rubiano nan no? Na mi opinion, ta p’esey. Pasobra nos ta sinta riba mannan cu otro lo uza si nan tabata tin e oportunidad. Pasobra nos asina custumbra na un calidad di bida “halto” y sigur, cu tin ora nos no ta aspira pa tin algo mas.

Na Santo Domingo, tin un muhe cu hamas lo sa con e ta sinti pa habri un cranchi y bebe un awa cu no lo dun’e dolor di bariga. Tin un muhe cu por ta hamas lo siña papia Ingles y comunica manera nos ta haci akinan. E Dominicano ta sali di su pais y ta pasa trabou pasobra e no tin un bon forma pa comunica, pasobra su pais no ta yena cu mesun hopi privilegio. Pasobra e no ta asina desaroya manera akinan na Aruba. E isla aki, pa chikito cu e ta, e ta duna bo tur locual bo mester pa por eleva bo mes. No solamente pa locual ta trata estudio, pero pasobra bo ta nace cu un nacionalidad y un paspoort cu ta habri tur porta di mundo pa bo, pasobra bo no tin cu bay para tur dia den solo dilanti di DIMAS wardando un beurt pa bo por yena un permiso, pasobra bo no tin cu roga un otro hende casa cu bo pa duna bo derechonan cu ya caba bo a nace cu ne. Rubiano, bo ta privilegia, bo ta bendiciona na un manera inmenso. Stop di sinta riba mannan y oportunidad cu hopi ta bringa pa tin.

Leave a Reply