ORANJESTAD – “Yakari, haz bahado de peso?” mi mama ta puntrami na telefon,

algun luna pasa ora mi tabata na Hulanda. Mi ta bisa e, tendemi Duska, mi no ta gordo okay! mi ta Caribe. Pero e storia no ta cuminsa y e no ta caba kinan tampoco.
Nos tin un historia completo di ta obsesiona cu nos curpa y curpa cu no ta di nos.

 

Algun dia pasa, cobando den mi Facebook memories mi a haya un potret unda mi tabata tin menos peso. Y minsa ken tur a encurashami pa bira flaco, con mi a hacie. E tempo ey mi a perde 25 kilo den algun luna, pero di berdad mi cabes tabata gewoon mustra mas grandi cu mi curpa. Mi ta wak e potret y mi ta corda e tempo ey di mi bida, si di berdad mi tabata mes feliz cu mi tabata mustra den e potret. Y contesta tabata un simpel no. Porta mi tabata na un peso cu mi tabata comodo cu ne, pero mino  por bisa cu mi tabata feliz pasobra ta hopi cos mi tabata pasando aden. Pakico mi ta pone beyesa y gordura den un mesun articulo, ta pa e simpel motibo cu masha tiki hende ta kere cu e dos cosnan aki por existi na mesun tempo.
Pasobra ki mishi hende gordo sinti bunita? Ki mishi hende gordo ta feliz? Ta flaco ta bunita y ta gordo ta mahos y punto. Esaki ta e mentalidad di mayoria di hende.Di berdad berdad, mi tin dos solo estado di animo. “Mi ta gordo, no papia cumi” of “Mi ta gordo, pero mi ta sabi y leuk y si bono gustami bo cuenta”. Okay, podise mi ta exagera.

 

“E cos mas tragico di e obsesion cu beyesa ta, cu e ta cuminsa cu e pensamento cu algo ta mahos” e poeta Nayyirah Waheed a skirbi. Un frase cu a keda cumi pa hopi largo.
Mino kier e articulo aki wordo saca di contexto y pone hende kere cu mi ta pro-obesidad,
of cu mi ta encontra di hende, cu ta esforsa nan mes pa mustra bon y ta haya felicidad den esey. Cada ken cu nan bida. Esaki mas bien ta un critica riba e echo cu nos ta biba den un era di superficialidad y vanidad. Unda beyesa ta poni riba un altar mas halto cu talento, bon caracter y educacion. Cu nos ta sinti cu asina hopi autoridad riba otro, pa comenta riba nan fisico dibiaha y den cara sin tene en cuenta con nos por pone un otro hende sinti. Cu nos ta bisa un hende “bo a bira gordo” of “bo a bira flaco” hopi mas lihe cu nos ta puntranan con bay cu nan, si nan ta sinti bon, etc. Cu nos ta asina lihe pa descarta un hende su logronan personal, pa pone enfasis riba con e ta mustra.

Mi a crece den un cas yen di muhe, muhenan cu semper tabata obsesiona cu nan curpa.
No tin un dia cu e palabra “gordo” no ta wordo menciona. E muhenan den mi bida, (incluyendo ami) ta compara nan curpa cu tur cos cu ta existi bou di shelo. Desde un saco di batata na un ayaca mal mara. Si no ta pildo chines ta lipo, si no ta bay cana, si no un tabay cuminsa gym, un ta para dilanti spiel ta pusha su bay ariba y bisa “bo ta wak? Mi djies tin cu para nan un tiki paso awo nan parse teti slof”. Tur dia ta un dieet nobo, tur dia ta un otro machine riba mercado. “Y warda mi bira barbie! Bo tabay wak!”. Pasobra awo venganza di berdad ta ora un hende bay lagabo y bo cuminsa mustra miho.

 

consequences-of-obsession-with-beauty

Y con nos tabay bringa un cultura cu ta obsesiona cu beyesa, con nos tabay libera nos mes di e curpanan cu nos ta trata manera prizon? Kidia nos tabay sera paz cu nos mesun curpa?
Ami tin un idea, pakico nos no ta cuminsa aprecia nos curpa pa kico e ta haci pa nos, na luga di con e ta mustra? Mi pianan por ta diki berdad, pero nan ta esunnan cu ta wantami para te hasta ora mi ta sinti cu mi ta cay den otro. Mi brasanan ta moli mane chickenwings, mi por bula bay Curacou cu nan,  pero ta cu nan ta brasa mi ser kerinan. Mi dedenan largo mane french fries ta cu nan mi ta skirbi poesia. Ta cu nan mi ta crea mi magia.
Esaki ta locual mi tin, pa mahos of bunita cu e porta den un otro su wowo.
Beyesa ta un perfume caro, cu ta bay lihe. Bono por depende di beyesa pa sostene bo.
Hunto nos por balora nos mes pa ken nos ta y no pa con nos ta mustra.
Duna un hende un compliment awe, cu no tin nada di haber cu su fisico y wak e sonrei.

 

 

Leave a Reply