ORANJESTAD – “Ami no ta preto, ami ta bruin!” un di mi primanan tabata yora tempo e tabata mas chikito. Na cas, tur hende (inlcuyendo ami, tabata tenta e).
Cu su cabey afro, su nanishi rondo, su frenta grandi y tur otro atributo cu tabata haci e un hende di color. Un mucha color scur, pa ta mas specifico.

Supla bay futuro, 14 anja mas laat, e ta e un proud black girl. Y ami un activista in the making cu kier purba di salba tur hende y combati un racismo cu te hasta ami tabata ciego na dje. El a tumami hopi tempo pa desconstrui ideologianan cu mi a wordo sinja desde chikito.
Awendia, mi prima cu su curvanan cu tur hende ta envidia, su color cinnamon, su long weave, ta un diva completo den su curpa. Pero esaki no kiermen cu su infancia a bira menos traumatico y si mi por a bay bek den tempo, mi nunca lo a yam’e preto como un termino di insulto. Ami no tabata sa miho.

Poco dia pasa, un di mi primanan mas chikito a yega cas ta yora. Dicon e ta yora? Nos a puntra e mama. E mama ta bisa nos, cu su otro yiu, un Missy Fu blanco (pa no yam’e rabo sushi) di 5 anja a bisa su ruman muhe di 10 anja cu e ta preto mahos. Pa prome, esun di 10 anja no ta preto, e tin un color indjan, cabey fini, mas cu tur cos e parse un indigena. Pero ya, e ta mas scur cu e otro ruman y esey ta algo cu te hasta Stevie Wonder por wak. E otro prima ta bisa “No worry cu ne, mi tambe a pasa aden, asina nan ta pero a nos tin black power”. Nos tur ta hari den cas, zundra e chikito, bisa e cu e no tin cu bisa cosnan asina y sigui cu bida. Pero esaki no ta kita afo, desde chikito muchanan ta haya tendencianan racista y esaki mas tanto, ta algo cu nan ta sinja di hende grandi rond di nan.

 

Den Caribe, nos ta crioyo. Un mescla di diferente historia, nacionalidad,
color di cuero, cabey, etc. Pero colorismo ta hunga un rol hopi grandi ainda den nos comunidad. Cu duele mi ta bisa, cu e te hasta den mi propio famia esunnan mas cla ta wordo faboreci. Mi mama nunca a wanta su lenga ora e tabata yega na expresa tocante hende color scur, nunca e no wanta su disgusto cu mi cabey a bira un afro despues di tempo y mas pio ainda cu mi tin e balentia pa cana cu ne habri y sin miedo. Nunca e ta stop di enfatisa cu ta blanco ta bunita y hende preto na su pais no ta bal nada. Algo ironico pa bisa mirando cu Santo Domingo ta 98% Afro-descendiente. E linjanan entre rasa ta hopi fini, hopi hende ta pasa full nan bida sin sa bou di cual spectrum nan ta cay. Bo por ta di color, pero si bo tin wowo di color nanishi fini bo ta pasa pa “bunita, exotico” den otro palabra ‘aceptabel’. Mientras cu si bo ta di color cla, pero bo a sali cu atributonan cu predominantemente ta di hende color scur e ora “bo lo por a ta bunita, pero bo nanishi a danjabo”.


Ora violencia contra hende di color ta pasa na Merca, ta hopi di nos compatriotanan ta grita
#BlackLivesMatter, pero ta ignora e racismo den nos mesun comunidad. Con San Nicolas constantemente ta wordo desacredita y djies pa coincidencia e ta e ciudad den e isla cu tin  mas tanto hende di color, con el a wordo “laga atras”. Y ora discussionnan pa San Nicolas bin dilanti nos ta scucha cosnan manera “nan mes no kier progresa”, “nan ta yena cu rabia”. “nan odia nan mes”. Tur esakinan ta dichonan hopi familiar pa hendenan cu sistematicamente ta wordo oprimi. Pero pa Carnaval si tur kier San Nicolas, mayoria di nos miho musiconan ta bin di San Nicolas. Manera hopi otro pais na mundo, Aruba tambe ta haci uzo di hende color scur pa nan propio entretenimiento, pero masha poco ta biba cu e realidad di kico e kiermen tin un color di cuero scur. Mientrastanto tur e casnan grandi banda di lama, na otro banda di e isla ta pertence na Hulandesnan y Americananonan blanco cu placa. Racismo ta algo global,
Y e termino pa ta socialmente informa di esey ta “woke”/ “spierta”. Paso asina bo wak e, no tin manera di no wak e mas. E ta tur caminda, e ta inflicta tur aspecto di nos bida.

Leave a Reply