UTRECHT – Herfst ta aproxima aki na Hulanda pero sorprendentemente e temperaturanan no a cuminsa baha ainda. Tur hende ta un poco contento, pero mi kier papia dicon culpabel hende ta pone nan mes sinti ora nan ta tristo.

Anja pasa ora mi a bin Hulanda den e prome vuelo mi a mira e pelicula di Disney yama “Inside out”. Un pelicula cu den e mundo anima a causa un poco turbulencia mirando cu e tabata enfoca riba e importancia di sentimentonan manera tristesa. Algo cu hende a pensa no lo ta mucho apto pa mucha wak. E pelicula tabata enfatisa con tin ora, ta e sentimento ey mes nos tin cu deal cune pa por sigui dilanti den bida. Kico nos no ta haci pa obtene felicidad? Sikiera pa un momento chikito, nos ta bay bebe, cumpra cos nobo, gasta placa cu nos tabata tin warda pa otro occasion. E idea absurdo cu ora bo ta tristo bo mester sali bay diverti pa saca e emocion ey di bo curpa. E triki ta cu tin ora tristesa ta bin cu lesnan cu simplemente bo no lo sinja si bo tabata contento. Pesey e ta importante pa duna tristesa su chens di opera y no core bay na momento cu bo ta sinti e bin.

Pa un curso yama “Diversity Skills” mi a scoge pa traha un research riba con bida ta
Pa un muhenan di kende nan apariencia ta pone hende cuestiona nan rasa. Mi a scoge pa entrevista mi poeta favorito Alysia Harris via skype y 20 minuut den nos conversacion
Nos a desvia y cuminsa papia di otro cosnan. Mi a conta Alysia tocante mi tristesa, con tin ora mi ta sinti e ta consumi cada parti dimi. El a bisami algo cu mi ta pensa mita mundo mester tende. E di cumi “Ora bo ta feliz, niun hende ta bisabo no ta mucho feliz of niun hende ta bisabo stop di ta feliz manera un kens. Pero pa un motibo of otro hende ta sinti cu nan tin e derecho di bisabo esey ora bo ta tristo. Y e no tabay asina, bo tin cu sa precisamente con profundo bo por sinti algo, bo mester haci esey pa conoce bo limitenan”. Pues ora bo scucha hende bisabo cu nan ta cobando nan mesun graf, laganan. Pasobra ora bo coba bo mesun graf so bo ta realisa cuanto bo mester traha pa saca bo mes afo bek.

Hende ta sobre mira e impacto cu ta tristo por tin riba nos. Con e ta haci nos empatetico
y mas humano. Claro cu e no ta algo saludabel pa keda pega den tristesa, pero e idea ta pa no rush e proceso di cura di cualkier circumstancia cu por haciendo un hende un tristo. Dune su tempo, yora si bo mester, scucha e mesun cancion 90 biaha si bo mester, pero lage “Run its course”. Stop di pone pleister riba heridanan cu mester biento, stop di purba tapa solo cu un dede. Si bo duna bo pena espacio pa e biba, eventualmente e lo disparce y lagabo liber pa sinti otro cos. Bo no mester puntra niun hende permiso, it is okay to not be okay.

 

(Publica den Bon Dia Aruba 12 september 2016, no por publica otro caminda sin permiso)

Leave a Reply