UTRECHT – Mi hendenan, e prome dia di herfst a yega y cu ne un sin fin di comentario Xenophobico riba Facebook. Aruba cu un campo di refugiado? Kico? Min ta kere! No tin luga pa mas hende riba nos pida baranca, Aruba ta yena cu Donald Trumps.

 

Mi ta ripiti locual mi a bisa algun siman pasa caba. Na Aruba ta hopi ta esnan cu ta critica racismo na Merca, pero ta aparentemente ciego na esun di nan mes. Pero no ta racismo so, paso e xenophobia ta tambe ta cana man wanta cu ne. Riba Facebook tur ta grita cu Donald Trump ta un desgracia pa humanidad, pero menciona cu algun Venezolano por bin busca refugio na Aruba y tur e xenophobia ta sali.

 

images-1

 

E odio contra Latino riba e isla ta asina bibo. E ta tur dia den mi cara, sin laga afo con media na Aruba ta keda pusha palo bou candela. Pero e ironico ta cu e mesun dedenan cu ta type odio contra e comunidad Latino na Aruba, ta e mesun dedenan cu sin problema ta pasa Las Morochas snack cumpra arepa traha pa mannan Venezolano. E mesun dedenan cu ta type con hopi nan odia Latino, ta e prome nan para den rij pa bay gosa na e concierto di Romeo Santos. E ora Donald Trump ta un bandido paso e kier traha un muraya.

E argumento ta keda cu Merca ta un pais grandi y Aruba ta un isla chikito y mane nan ta bisa “no hay cama pa tanta gente”. Discusionnan pakico si of pakico no tin cu acepta hende riba e isla ta sano. Nan ta necesario. Locual mino ta comprende ta pakico mester yena e dialogo cu tanto odio. Pakico mester insinua cu tur Latina ta bin Aruba prostitui nan mes, pakico mester yama hende morto di hamber, pakico mester deshumaniza Latinonan asina? Aruba ta yena cu immigrante cu ta bin e isla busca un miho bida. Pero e Chinesnan, Surinameñonan, Filipinonan, Hulandesnan, etc. No ta wordo demonisa manera e Latinonan. Mientras cu den realidad, esunnan cu mas ta wordo uza pa tur e trabounan ey cu tur hende ta considera baho ta e Latinonan.  Ken ta ocupa e mayoria di trabounan di haci limpieza na compania, di traha na cas di famia, di limpia baño na hotel? Latino. Ken commerciantenan ta tuma pa traha como illegal y paganan 6 florin pa ora y tog ta tuma esaki paso e ta miho cu nada? Latino.

 

E echo cu pa sanger mi ta Latina pero mi curason ta keda bati pa e comunidad Rubiano ta casi sinti manera masochismo. E ta keda e dilema di mi bida, un identidad parti den dos. Pero tur dia mi ta lanta cu gana di aporta na un comunidad cu ta kibra Latinonan na pida pida asina nan haya un chens. Diferencianan cultural ta duro pa anda cu ne. Ora bo ta na un otro hende su luga, purbando di haya un miho bida pa bo mes pretende di ta un tiki sordo, un tiki mudo y un tiki sinberguensa ta esencial pa sobrevivi. Cu tur mi honestidad, ami tampoco gusta tur hende. Keremi mi no un fanatico di hende Hulandes, mi tambe kier tera habri y gulimi cada biaha cu mi ta e unico cos di color den un grupo di hende blanco. Mi tambe ta primi boton y haci chasconan cu  tin di haber cu stereotiponan di nan cultura.
Pero tin un diferencia hopi grandi entre tin opinionnan personal cu ta skerpi tocante un cierto grupo di hende y dehumanizanan pasobra nan no ta cay na bo agrado.
Bo ta trata Latinonan malo awe sin ningun motibo of base, excepto locual bo ta lesa den corant tocante di nan. Mayan ora bo bin Hulanda, nan ta haci mescos cu bo.
Na Aruba nan odia Latino y tolera tur otro cos. Na Hulanda nan odia Turko y Marrokano y ta discriminatorio contra tur otro cos. Na Santo Domingo nan tin un anti-Haitianismo grandisimo, pero nan ta tolera tur otro cos. Na final, cada pais tin nan mesun motibonan.
Y aunke bono por controla tur hende nan odio, bo por controla esun di bo mes.
Bo por conscientemente scoge di no añadi na un candela cu ta kimando un grupo di hende.
Bo por scoge pa formula bo opinionnan sin odio, stop di uza bo plataforma pa dehumaniza otro. Ta ora pa stop di kibra y cuminsa construi.

 

Leave a Reply