ORANJESTAD – Otro siman a pasa, caminda atrobe medionan di comunicacion tabata yena cu noticia cu di un of otro manera tabata involucra violencia contra hende muhe.Sino ta un cu a grita y bati un dama, ta un cu a menasa cu e lo hinca e cu cuchiu, e storianan ta infinito.

Y awo, ta falta di ken atrobe? Riba ken nos tabay punta dede ora cu colectivamente hombernan den nos sociedad ta dicidi cu nan tin autoridad suficiente pa pone man riba un hende muhe. Kidia nos tabay sinta dialoga y cuminsa desconstrui e machismo toxico cu dia aden dia afo ta destrui nos sociedad. Bin bisa cu e ta hende muhe su falta, cu “como muhe bo mester duna bo mes di respeta”. Siendo cu te hasta muhenan cu segun wowonan di sociedad ta bon muhe ta wordo abusa. Si muhenan ta wordo bati dilanti nan yiunan chikito, pa hombernan cu simplemente no por controla nan rabia.

Esaki ta locual mi kier sociedad cuminsa comprende, cu como muhe, no tin manera corecto di actua ora cu homber ta mirabo manera un obheto. Ora cu bo ta stop di ta humano y wordo mira manera algo cu ta na mundo pa sirbi, pa traha yiu, pa cuida cas. Bo por ta tapa di pia te cabes y nan lo kitabo sunu cu nan propio wowonan. No pretende cu muhenan cu ta cana tapa, no ta wordo acosa y grita cosnan mahos riba caya paso nan ta. No pretende cu un muhe por djies hisa benta y laga un homber cu ta abusa y menasa cu mata su persona di un dia pa otro, pasobra e no por. Den pasado mi a yega di skirbi caba, no tin victima perfecto.


Nos no por sigui culpa hende muhe, pa comportacion di hende homber.

 

10-15-2012-d-10-min


Nos por sigui ignora cu machismo. ta haci hende homber danjo tambe. E idea kens ey cu homber no ta yora, Cu homber no expresa nan emocionnan, cu nan ta wanta tur cos paden y despues expresa den manera violento. Mino ta pensa ningun mama ta lanta nan yiu hombernan pa ta violento.Mino ta pensa ningun mama ta lanta nan yiu hombernan pa trata hende muhe malo.


E ora, con e ta cuminsa? Kidia e mucha homber chikito ney, cu nos a cria foy nos pecho ta cuminsa odia nos? Pasobra homber ta insulta hende muhe pa tur cos. Sea ta nos peso, nos fisico, nos panjanan, kico nos ta haci cu nos cabey, si nos tin strechmarks, celulitis, etc.
Si nos tin tete falso, si nos tin tete di slof, e ta un puntamento di dede cu no ta caba.
Ken ta bisa nos yiu hombernan chikito cu nan por trata hende muhe con cu ta?
Kidia nos ta stop di ta nan mama, rumannan, primanan y nos ta bira nan cos di primi den banda, nan ‘side-chick’, nan ‘hoes’, nan luga di baha rabia. Kidia nos ta stop di wordo mira como ser humano y cuminsa wordo mira manera obheto cu nan tin cu posee y dicidi riba dje?
Ta basta di violencia contra hende muhe. Si bo tin rabia, bay lama, bay core, bay un psicologo, bebe na un bar, papia cu un amigo. Pasobra violencia no ta resolve nada y fuera di esey e ta un mal ehempel pa e generacion cu ta bin.


Leave a Reply