yakari

 

UTRECHT – Bek na Hulanda den e shinishi y e frieu, mi ta pensa riba mi bunita isla
y tur locual mi a biba den vakantie. Con hopi mi perspectiva tocante Aruba a cambia
y e  “Aruba pro pedofiel” cu mi a mira skirbi tur caminda rond di e isla.


E ta duro admira e beyesa di Aruba, den auto cu bo muziek y bo chill den man ora
Cu den cada skina e palabra ‘pedofiel’ ta den bo cara. Mi a bishita e anochi di e exposicion final di Caribbean Linked,
cual pami tabata algo sumamente magico. No solamente pa e orguyo cu mi ta sinti ora mi wak arte Caribense, sino pasobra e biaha aki mi a mira obranan cu directamente tabata duna imagen na cosnan cu ta pasando den nos sociedad. Mi a mira arte cu a pone mi haya kippenvel, manera un cama cu un homber drumi riba dje y rondona tabata tin yen boter di alcohol pega den bloki. E homber keda tira eynan full e anochi, cual ta e mesun imagen cu por wordo mira den algun skina di Oranjestad.


Pero podise esun di mas impactante tabata e borchi preto, caminda e artista tabata keda skirbi
“Aruba pro pedofiel”. E tabata yena e borchi completo, haci esaki limpi y cuminsa desde e principio. Cual ta precisamente locual ta pasando den comunidad, un hende ta verf riba dje y e ta bolbe aparece bek. Mi ta admiti cu mi ta completamente pro e lucha pa hisa e castigo di e pedofielnan na Aruba. E meneer cu ta fliet tur caminda podise no a lanta dialogo na e manera di mas sano, pero el a haci algo cu mester a pasa si. El a lanta dialogo, el a lanta un conversacion incomodo. Pone nos wak un realidad y si ainda nada no a wordo haci no tin manera mas di nenga cu e ta existi. Na final di dia, bono por tapa e dolor di un mucha cu a wordo abusa cu un cabay blauw, na final di dia bono por hoga e gritonan pa husticia cu

un cantica tocante tin dushi bida. Haci esey ta mal uza arte. Nos por scoge pa pone enfoce riba e cosnan cu si ta bon cu nos isla, nos por bira nos cara, pero djies pasobra nos ta ignora algo no kiermen cu e ta stop di existi. Inhusticia social ta un djente putri cu bo mester saca afo, aunke e ta danja bo smile. #StopAwo, tabata un bon hashtag. Un campanja riba redenan social pa lanta conscientisacion contra abuso. Pero atrobe, manera custumber e tabata den un contexto comfortabel, e tabata un “okay, ban share esaki pasobra e ta locual tur hende ta haciendo”.  “Aruba pro pedofiel” a causa rabia, a causa angustia, a pone hende lanta bay verf un muraya, a pone hende sinti insigur y incomodo, a pone hende subi caminda y marcha. E ta un cuminsamento, e ta e prome grito di un pueblo cu a sufri trankil pa hopi tempo.
Ora e berdad yega, con cu bo wak e inhusticia y abuso no ta cosnan ta yama pa silencio.
Kibra e taboo, papia, haci hende incomodo. Si hende no kier scucha, e ora nan tin cu sinti.


 

 

 

 

Leave a Reply