ORANJESTAD – “Silencio ta un forma di violencia”, mi a scucha di e directora di fundacion pa muhenan den dificultad durante un entrevista poco lunas atras. E ta un frase cu a keda cumi. Un frase cu mi ta reflexiona hopi riba dje. Pasobra di berdad, si nos ta keto ora cu nos mira cos malo wordo haci, si nos consenshi ta bisa cu e ta malo, pakico nos ta bira nos cara?

Tin poder den bo stem, tin poder den para y papia y bisa algo aunke cu bo haci esaki cu miedo. No tin hende irelevante, solamente hende y un sistema cu ta pone nos pensa cu nos ta.

Awendia internet a duna pueblo poder bek. Noticia ta core asina lihe. Recientemente e discusion tocante e propuesta pa legaliza matrimonio entre parehanan homosexual na Aruba tin media social bou di tension. Tin por debati na un manera sano y bisa pakico nan ta of no ta apoya esaki. Pero pa esunnan cu no tin nada contra hende homosexual y ta prefera di keda sinta y no papia, no post un status, no ta comparti un articulo. Kico precisamente e comunidad LGBT por haci cu bo aceptacion si bo no ta dispuesto pa papia pa nan ora nan ta wordo discrimina y maltrata? Claro cu esaki cu no ta conta pa e legalisacion di matrimonio di parehanan homosexual so. E ta conta pa cada biaha cu nos observa violencia y abuso wordo cometi y conscientemente dicidi di no haci nada. E ta conta pa cada biaha cu bo scucha e bisinja bati su casa y bo dicidi cu bo tabay ignora e zonido di su lagrimanan pasobra e no ta bo problema. E ta conta pa cada biaha cu bosa cu un mucha ta wordo abusa sexualmente y bono ta bisa niun instancia cu por yuda. Si bo ta encontra di algo, e ora para. E ora bisa esey,

para lomba strit, para cu bo dos pianan firme riba tera. Si bo ta contra discriminacion, abuso di mucha, violencia, etc. Expresa esaki, grita uzando tur e forsa y e aire den bo pulmon, cuminsa un dialogo cu un grupo di hende, puntra con bo por yuda.

Pasobra cada acto di curashi pa chikito cu e ta ta marca un diferencia. Pasobra den palabranan di Malala Yousafai“Ora henter mundo ta keto, un solo stem ta bira poderoso’. Si di berdad bo ta contra algo, e ora actua pasobra silencio nunca lo salba niun hende. Nos no por tuma bo apoyo silencioso como metodo di sosten ora cu tin hende su bida den peliger. Ora cu bidanan ta wordo kibra y hendenan ta wordo kita di trabou pa nan preferencia sexual. Nos no por haci nada cu bo silencio ora cu leynan mester wordo cambia, ora cu un grupo chikito ta sufri pa ignorancia di un grupo grandi. Si bo tin un plataforma pa papia, e cos di mas remarcabel cu bo por haci cu ne ta uza esaki pa papia pa esunnan cu no por papia pa nan mes. Si bo tin acceso na internet, na un telefon, na mas cu un forma di comparti locual bosa y locual bo ta kere aden haci esaki.


Haci esaki den un manera corecto, den un manera cu lo yuda otro. No kere cu un solo hende no por marca e diferencia, paso e por. Para pa locual cu ta corecto aunke bo para bo so.

 

Leave a Reply